پٹرول مہنگا ہونے کے بعد گڈز ٹرانسپورٹرز نے کرایوں میں 20 فیصد اضافہ کر دیا

پاکستان میں پٹرولیم مصنوعات کی قیمتوں میں حالیہ اضافے کے بعد گڈز ٹرانسپورٹرز نے مال بردار کرایوں میں 20 فیصد اضافہ کر دیا ہے۔

 پاکستان گڈز ٹرانسپورٹ الائنس کے صدر ملک شہزاد اعوان کے مطابق گزشتہ دو ماہ میں ڈیزل کی قیمت میں فی لیٹر 78 روپے اور پٹرول کی قیمت میں 68 روپے اضافہ ہوا ہے جس کے باعث ٹرانسپورٹرز کے اخراجات میں نمایاں اضافہ ہوا ہے۔

انہوں نے کہا کہ اگر پٹرولیم مصنوعات کی قیمتوں میں اضافہ ناگزیر تھا تو وفاقی حکومت کو ٹول ٹیکس اور دیگر ٹیکسز میں کمی کر کے ٹرانسپورٹرز کو ریلیف دینا چاہیے۔

 ملک کی نازک معاشی صورتحال کے باوجود ٹرانسپورٹرز کاروباری سرگرمیاں جاری رکھے ہوئے ہیں، تاہم ایندھن کی قیمتوں میں مسلسل اضافے سے نہ صرف ٹرانسپورٹرز بلکہ عوام بھی متاثر ہو رہے ہیں اور مہنگائی میں اضافہ ہو سکتا ہے۔