ایران نے جنگ روکنے کے لیے 6 سٹریٹجک شرائط پیش کیں

تہران: ایران کے ایک اعلیٰ عہدیدار نے کہا ہے کہ ایران نے جنگ روکنے کے لیے علاقائی پارٹیوں اور ثالثوں کو چھ سٹریٹجک شرائط پیش کی ہیں۔

عہدیدار نے نام ظاہر کیے بغیر ایرانی میڈیا کو بتایا کہ علاقائی پارٹیوں اور ثالثوں نے ایران کو جنگ ختم کرنے کی تجاویز پیش کی ہیں۔

 نئے قانونی و سٹریٹجک فریم ورک کے تحت ایران نے چھ شرائط بیان کیں، جن میں پہلی شرط یہ ہے کہ جنگ دوبارہ شروع نہ ہونے کی یقین دہانی کرائی جائے۔

دوسری شرط خطے میں امریکی فوجی اڈوں کو بند کرنا ہے، تیسری شرط جارح کو پیچھے دھکیلنا اور ایران کو ہرجانے کی ادائیگی کرنا ہے، اور چوتھی شرط تمام علاقائی محاذوں پر جنگ ختم کرنا ہے۔

پانچویں شرط آبنائے ہرمز کے لیے نئے قانونی نظام پر عمل درآمد ہے، جبکہ چھٹی شرط ایران مخالف میڈیا آپریشنز کے خلاف قانونی کارروائی اور انہیں ملک بدر کرنا ہے۔

یہ واضح نہیں کیا گیا کہ یہ شرائط کن ثالثوں کے ذریعے امریکا اور اسرائیل تک پہنچائی گئی ہیں۔

ایرانی میڈیا کے مطابق سکیورٹی اور سیاسی اہلکاروں نے کہا کہ ایران کی شرائط کو سنجیدگی سے لینا چاہیے۔

 عہدیدار نے بتایا کہ ایران نے مہینوں سے طے شدہ حکمت عملی کو سٹریٹجک صبر کے ساتھ آگے بڑھایا ہے اور دعویٰ کیا کہ ایران اب دشمن کے فضائی دفاع پر مکمل قابو رکھتا ہے، تاہم اس صورتحال میں فوری جنگ بندی کے امکانات نہیں دکھائی دیتے۔