کرپشن الزامات: نیتن یاہو کی معافی کی درخواست پر وضاحت طلب

اسرائیلی صدر آئزک ہرزوگ نے وزیراعظم بنیامین نیتن یاہو کی کرپشن الزامات سے متعلق معافی کی درخواست وزارت انصاف کو واپس بھجوا دی اور مزید وضاحت طلب کر لی۔

صدر نے درخواست پر فیصلہ کرنے سے پہلے مزید قانونی مواد طلب کیا ہے۔

 ان کے قانونی مشیر کے مطابق جاری عدالتی کارروائی کے دوران معافی دینے کے اختیارات سے متعلق سابقہ مثالوں اور اضافی قانونی نکات کا جائزہ لینا ضروری ہے، خاص طور پر ایسے معاملات میں جہاں سفارتی یا سلامتی کے پہلو شامل ہوں۔

حکام کا کہنا ہے کہ یہ اقدام صرف پیشہ ورانہ جائزے کے لیے ہے اور اس سے کسی حتمی فیصلے کا اشارہ نہیں ملتا۔

دوسری جانب امریکی ریپبلکن مبصر ٹکر کارلسن نے نیتن یاہو کی کرپشن سے متعلق دستاویزی فلم اپنے چینل پر جاری کر دی ہے۔

 اس فلم میں اسرائیلی پولیس کی تفتیش کی تقریباً ایک ہزار ریکارڈنگز شامل ہیں، تاہم اسرائیل میں اس فلم پر پابندی عائد ہے۔