مقاصد کی تکمیل تک جنگ جاری رہے گی، ٹرمپ کا ایران پر مزید حملوں کا اعلان

امریکی صدر ڈونلڈ ٹرمپ نے ایران پر آئندہ دو سے تین ہفتوں میں مزید شدید حملے کرنے کا اعلان کرتے ہوئے کہا ہے کہ جنگ اس وقت تک جاری رہے گی جب تک تمام مقاصد حاصل نہیں ہو جاتے۔

عوام سے خطاب میں انہوں نے کہا کہ ایران کے خلاف کارروائی کو ایک مہینہ ہو چکا ہے اور اس دوران امریکی فوج نے فیصلہ کن حملے کیے ہیں۔ 

ان کا دعویٰ تھا کہ ایران کی بحریہ اور فضائیہ کو مکمل طور پر تباہ کر دیا گیا ہے، کئی رہنما ختم ہو چکے ہیں اور جوہری صلاحیت بھی ختم کر دی گئی ہے۔

انہوں نے کہا کہ جنگ کا مشکل مرحلہ مکمل ہو چکا ہے اور اسٹریٹجک مقاصد تکمیل کے قریب ہیں، تاہم مکمل کامیابی تک کارروائیاں جاری رہیں گی۔

ٹرمپ نے ایران کی تیل تنصیبات کو نشانہ بنانے کا اشارہ دیتے ہوئے سخت دھمکی بھی دی اور کہا کہ ایران کو پتھر کے زمانے میں پہنچا دیا جائے گا۔

انہوں نے جنگ میں 13 امریکی فوجیوں کی ہلاکت کی تصدیق کی اور ایرانی حکومت پر 45 ہزار مظاہرین کو قتل کرنے کا الزام بھی عائد کیا، تاہم اس حوالے سے کوئی ثبوت پیش نہیں کیا۔

امریکی صدر کا کہنا تھا کہ امریکہ کو آبنائے ہرمز کی ضرورت نہیں، جبکہ دیگر ممالک اپنی ضروریات کے مطابق تیل حاصل کریں گے۔

انہوں نے اسرائیل، سعودی عرب، قطر، متحدہ عرب امارات، کویت اور بحرین کو اہم ممالک قرار دیتے ہوئے ان کے تحفظ کی یقین دہانی بھی کرائی۔

تیل کی قیمتوں سے متعلق بات کرتے ہوئے انہوں نے کہا کہ خطے میں کشیدگی کے باعث قیمتوں میں اضافہ ہوا، تاہم امریکہ اب تیل اور گیس پیدا کرنے والا بڑا ملک بن چکا ہے۔

آخر میں انہوں نے ناسا کو آرٹیمس مشن کے آغاز پر مبارکباد دی اور اس کی کامیابی کے لیے نیک خواہشات کا اظہار کیا۔