زیادہ نمک کے استعمال سے دل کی ناکامی کا خطرہ بڑھ سکتا ہے: نئی تحقیق

ماہرین صحت کے مطابق نمک (سوڈیم) کا زیادہ استعمال نہ صرف ہائی بلڈ پریشر کا باعث بنتا ہے بلکہ ایک نئی تحقیق میں انکشاف ہوا ہے کہ یہ دل کی ناکامی کے خطرے کو بھی بڑھا سکتا ہے۔

وینڈربلٹ یونیورسٹی کے محققین نے بتایا کہ زیادہ سوڈیم کا استعمال خاص طور پر حساس افراد میں دل کی ناکامی کا براہِ راست سبب بن سکتا ہے۔ 

یہ تحقیق جرنل آف دی امریکن کالج آف کارڈیالوجی ایڈوانسز میں شائع ہوئی ہے اور اس میں امریکا کے جنوب مشرقی علاقوں سے تعلق رکھنے والے 25 ہزار 300 سے زائد افراد کا جائزہ لیا گیا۔

تحقیق کے مطابق شرکاء اوسطاً تجویز کردہ مقدار سے تقریباً دوگنا نمک استعمال کر رہے تھے، جس کے نتیجے میں دل کی نئی بیماری کے خطرے میں 15 فیصد تک اضافہ دیکھا گیا۔ 

ماہرین نے مزید کہا کہ روزانہ ہر اضافی 1000 ملی گرام سوڈیم دل کی ناکامی کے خطرے کو 8 فیصد تک بڑھا سکتا ہے، چاہے موٹاپا، کولیسٹرول یا بلڈ پریشر جیسے عوامل شامل ہی کیوں نہ ہوں۔

امریکن ہارٹ ایسوسی ایشن کے مطابق روزانہ سوڈیم کا استعمال 2300 ملی گرام تک محدود ہونا چاہیے، جبکہ تحقیق میں شامل افراد اوسطاً 4269 ملی گرام استعمال کر رہے تھے۔ 

ماہرین نے کہا کہ نمک کے استعمال میں معمولی کمی بھی دل کی بیماریوں کے خطرات کو نمایاں حد تک کم کر سکتی ہے، تاہم کم آمدنی والے طبقات میں صحت مند خوراک تک محدود رسائی ایک بڑی رکاوٹ ہے۔