پنجاب ، مفت گوگل آئی ٹی کورسز، ریکارڈ سکالرشپس دینے کا فیصلہ

پنجاب حکومت نے تعلیم کے شعبے میں انقلابی اقدامات کرتے ہوئے طلبہ کے لیے مفت گوگل آئی ٹی کورسز، ریکارڈ اسکالرشپس، جدید آئی ٹی لیبز اور کالجز کی سٹینڈرڈائزیشن جیسے اہم فیصلے کیے ہیں۔ 

وزیراعلیٰ پنجاب مریم نواز شریف کی زیر صدارت خصوصی اجلاس میں پنجاب کے سکول اور ہائر ایجوکیشن سیکٹر میں بڑے پیمانے پر اصلاحات اور طلبہ فلاحی اقدامات کی منظوری دی گئی۔

 اجلاس میں فیصلہ کیا گیا کہ صوبے کے ایک لاکھ سے زائد طلبہ کو گوگل سرٹیفکیشن کورسز مفت فراہم کیے جائیں گے، جن کی فیس 400 سے 1000 ڈالر تک بنتی ہے۔ ان کورسز میں سائبر سکیورٹی، مصنوعی ذہانت (AI)، بزنس انٹیلی جنس اور دیگر جدید آئی ٹی مہارتیں شامل ہوں گی۔ 

اجلاس میں کالجز ایجوکیشن کی سٹینڈرڈائزیشن کا اصولی فیصلہ بھی کیا گیا، جبکہ پہلی مرتبہ سرکاری کالجز میں پرنسپلز، اساتذہ اور اداروں کی کارکردگی جانچنے کے لیے ’کے پی آئیز‘ مقرر کرنے کی منظوری دی گئی۔ اسی طرح سرکاری یونیورسٹیوں کے وائس چانسلرز کی کارکردگی بھی انہی پیمانوں پر جانچی جائے گی۔

 وزیراعلیٰ نے ہونہار سکالرشپ پروگرام کے تحت تمام اہل طلبہ کو وظائف دینے کا حکم دیا، جس کے نتیجے میں پنجاب کی تاریخ میں پہلی بار بیک وقت 62 ہزار 949 طلبہ کو سکالرشپس دی جائیں گی۔ مختلف مراحل میں کروڑوں روپے کے وظائف مختص کیے گئے ہیں جبکہ گریجویٹ طلبہ کے لیے بھی خصوصی اسکالرشپ کا اعلان کیا گیا ہے۔

 تعلیمی انفراسٹرکچر کی بہتری کے لیے 166 سرکاری کالجز میں جدید آئی ٹی لیبز قائم کی جائیں گی، جبکہ 29 اضلاع کے 36 کامرس کالجز کو 19 سرکاری یونیورسٹیوں سے منسلک کرنے کا فیصلہ کیا گیا ہے، جہاں بزنس، فنانس، آئی ٹی اور ای کامرس سمیت 14 بی ایس پروگرامز پڑھائے جائیں گے۔ 

طلبہ کی سہولت کے لیے کالج اسٹوڈنٹس کے لیے الیکٹروبس سروس شروع کرنے اور لیپ ٹاپ اسکیم کو مزید وسعت دینے کی بھی منظوری دی گئی، جس سے ہزاروں طلبہ مستفید ہوں گے۔ اقلیتی طلبہ کو بھی اوپن میرٹ پر لیپ ٹاپ دینے کی ہدایت جاری کی گئی ہے۔