وزیر خارجہ اسحاق ڈار سے کینیڈین ہائی کمشنر کی ملاقات، علاقائی امن کے لیے پاکستانی کوششوں کی تعریف

کینیڈا کے ہائی کمشنر طارق علی خان نے نائب وزیراعظم اور وزیر خارجہ سینیٹر محمد اسحاق ڈار سے ملاقات کی ہے، ملاقات کے دوران کینیڈین سفیر نے علاقائی امن و استحکام کے فروغ کے لیے پاکستان کی سفارتی کوششوں اور سہولتکاری کے کردار کو سراہتے ہوئے کینیڈا کی جانب سے بھرپور حمایت کا یقین دلایا۔

 ملاقات میں پاکستان اور کینیڈا کے درمیان دوطرفہ تعلقات، حالیہ اعلیٰ سطح کے رابطوں اور مختلف شعبوں میں تعاون بڑھانے پر تبادلہ خیال کیا گیا۔

 نائب وزیراعظم اسحاق ڈار نے اس موقع پر گفتگو کرتے ہوئے کہا کہ پاکستان خطے اور عالمی سطح پر پائیدار امن کے قیام کے لیے اپنی کوششیں جاری رکھنے کے لیے پرعزم ہے۔ 

انہوں نے دونوں ممالک کے مابین حالیہ عرصے میں ہونے والے اعلیٰ سطحی رابطوں پر اطمینان کا اظہار کیا اور اس عزم کا اعادہ کیا کہ پاکستان کینیڈا کے ساتھ اپنے دوطرفہ تعلقات کو متنوع شعبوں میں مزید مستحکم کرنے کا خواہاں ہے۔

 ملاقات کے اختتام پر دونوں جانب سے سفارتی و تجارتی تعلقات کو نئی بلندیوں تک لے جانے کے عزم کا اظہار کیا گیا۔