کالعدم شدت پسندوں کی مبینہ آڈیو وائرل، پی ٹی آئی کے آصف محسود کو نہ چھیڑنے کی ہدایت

کالعدم شدت پسندوں کی مبینہ آڈیو وائرل ہوگئی، جس میں پی ٹی آئی کے رکن صوبائی اسمبلی آصف محسود کو نہ چھیڑنے اور جانے دینے کی ہدایت دی گئی ہے۔ 

آڈیو میں دہشت گرد کمانڈر بادشاہ اور راکٹی گفتگو کررہے ہیں، جس میں دہشت گرد کمانڈر بادشاہ نے کہا کہ آصف محسود کے حوالے سے غلط فہمی ہوئی ہے۔ 

مبینہ آڈیو گفتگو میں آصف محسود کو گرفتار نہ کرنے اور معذرت کرنے کی ہدایت کی گئی ہے اور کہا گیا کہ پی ٹی آئی کے رکن صوبائی اسمبلی کو نقصان نہیں پہنچایا۔ 

اس معاملے پر پی ٹی آئی کے ایم پی اے آصف محسود نے کہا کہ ان کا ان افراد سے کوئی تعلق نہیں نہ ہی وہ انہیں جانتے ہیں۔ اگر ان کے درمیان کوئی گفتگو انٹرسیپٹ ہوئی ہے تو اس سے ان کا کوئی واسطہ نہیں، وہ وزیرستان اپنے علاقے گئے تھے۔ 

پی ٹی آئی کے ایم پی اے نے یہ بھی کہا کہ ان لوگوں سے ان کا کوئی لینا دینا نہیں، یہ بھی علم نہیں کہ مبینہ گفتگو درست ہے یا نہیں۔