رنبیر کپور کو ’بالی ووڈ‘ کیوں پسند نہیں؟ وجہ بتادی
معروف بھارتی اداکار رنبیر کپور نے انکشاف کیا ہے کہ انہیں ہندی فلم انڈسٹری کے لیے استعمال ہونے والی اصطلاح ’بالی ووڈ‘ پسند نہیں اور وہ خود کو بالی ووڈ اداکار کے بجائے بھارتی سنیما کا نمائندہ کہلوانا زیادہ پسند کرتے ہیں۔
برطانوی میڈیا کو دیے گئے ایک انٹرویو میں رنبیر کپور نے بھارتی فلم انڈسٹری کی مختلف شاخوں کے لیے بالی ووڈ، ٹالی ووڈ اور دیگر علاقائی ناموں کے استعمال پر اپنے تحفظات کا اظہار کیا۔
اداکار اپنی آنے والی بڑے بجٹ کی فلم کی تشہیر کے سلسلے میں لندن میں موجود تھے، جہاں ان سے سوال کیا گیا کہ وہ دنیا بھر میں مقبول اصطلاح ’بالی ووڈ‘ کو کیوں پسند نہیں کرتے۔
اس سوال کے جواب میں رنبیر کپور نے کہا کہ بالی ووڈ کا نام دراصل ہالی ووڈ سے متاثر ہوکر رکھا گیا تھا۔ ان کے مطابق ممبئی کا پرانا نام بمبئی ہونے کی وجہ سے ہندی فلم انڈسٹری کو بالی ووڈ کہا جانے لگا۔
انہوں نے وضاحت کی کہ اسی طرز پر تیلگو فلم انڈسٹری کے لیے ٹالی ووڈ کی اصطلاح استعمال ہونے لگی، جبکہ دیگر علاقائی فلم انڈسٹریز کو بھی الگ الگ نام دے دیے گئے۔
رنبیر کپور کا کہنا تھا کہ وہ اپنی شناخت کسی ایک علاقائی فلم انڈسٹری تک محدود نہیں رکھنا چاہتے بلکہ پورے بھارتی سنیما کی نمائندگی کرنا پسند کریں گے۔
اداکار نے کہا کہ بھارت ایک ایسا ملک ہے جہاں مختلف زبانیں، ثقافتیں، روایات اور ریاستیں موجود ہیں، لیکن ان تمام اختلافات کے باوجود فنکاروں کا بنیادی مقصد تخلیقی فن پیش کرنا ہے۔
انہوں نے اس بات پر زور دیا کہ فن کی کوئی سرحد نہیں ہوتی اور ایک اچھی کہانی زبان یا علاقے کی پابندیوں سے بالاتر ہوکر دنیا بھر کے ناظرین تک پہنچ سکتی ہے۔
رنبیر کپور کے مطابق اگر کوئی فلم ساز اپنی ثقافت اور روایات سے جڑی ایک سچی اور مستند کہانی پیش کرتا ہے تو وہ دنیا کے مختلف حصوں میں رہنے والے لوگوں کے دلوں کو متاثر کرسکتی ہے۔
اداکار کے بیان سے واضح ہوتا ہے کہ وہ بھارتی فلم انڈسٹری کو مختلف علاقائی ناموں میں تقسیم کرنے کے بجائے ایک وسیع اور مشترکہ شناخت کے تحت دیکھنے کے حامی ہیں۔
