وزیراعلیٰ پنجاب مریم نواز کی جاپانی سرمایہ کاروں کو اسپیشل اکنامک زونز میں سرمایہ کاری کی دعوت

news-banner

پاکستان - 19 اگست 2025

وزیراعلیٰ پنجاب مریم نواز نے جاپان کے بیرونی تجارت کے ادارے کے صدر سے ملاقات میں جاپانی سرمایہ کاروں کو پنجاب کے اسپیشل اکنامک زونز میں سرمایہ کاری کی دعوت دی۔

 

اعلامیے کے مطابق مریم نواز نے کہا کہ پنجاب میں ٹیکس فری اسپیشل اکنامک زونز میں زمین مفت فراہم کی جا رہی ہے، جہاں جاپانی کمپنیاں مصنوعات کی تیاری اور اسمبلنگ کے پلانٹ لگا سکتی ہیں۔ ان کے مطابق پنجاب نہ صرف ایک بڑی مارکیٹ ہے بلکہ مشرقِ وسطیٰ اور افریقہ کے لیے مینوفیکچرنگ کا مرکز بھی بن سکتا ہے۔

 

انہوں نے جاپانی اداروں کو پنجاب کے نجی اور سرکاری شعبے کے ساتھ مشترکہ منصوبے شروع کرنے کی دعوت دی اور نواز شریف آئی ٹی سٹی میں آئی ٹی پارکس کے قیام کی پیشکش بھی کی۔

 

مریم نواز نے کہا کہ پاکستان نوجوانوں کی اکثریت پر مشتمل ملک ہے، جاپانی کمپنیاں نوجوانوں کو ہنر مند بنانے میں اہم کردار ادا کر سکتی ہیں۔ انہوں نے اس عزم کا اظہار کیا کہ پنجاب کو جاپان کی طرز پر ٹیکنالوجی کے میدان میں آگے لے جانا چاہتی ہیں۔

 

وزیراعلیٰ پنجاب کے مطابق صوبہ جاپان کو سرجیکل آلات، لیدر مصنوعات، کھیلوں کا سامان اور باسمتی چاول کی برآمدات بڑھانے میں دلچسپی رکھتا ہے، جبکہ اس وقت پنجاب میں 20 اسپیشل اکنامک زونز غیر ملکی سرمایہ کاری کے لیے دستیاب ہیں۔