ملک بھر میں بارشوں اور سیلاب کا الرٹ، این ڈی ایم اے کی ہدایت

محکمہ موسمیات نے 29 اگست سے 2 ستمبر تک ملک کے مختلف حصوں میں گرج چمک کے ساتھ بارشوں کی پیش گوئی کی ہے، جس پر نیشنل ڈیزاسٹر مینجمنٹ اتھارٹی (این ڈی ایم اے) نے الرٹ جاری کر دیا ہے۔

این ڈی ایم اے کے مطابق شمالی و شمال مشرقی پنجاب (راولپنڈی، اٹک، جہلم، چکوال، لاہور، گوجرانوالہ، سیالکوٹ، گجرات، نارووال، حافظ آباد، منڈی بہاؤالدین) میں 30 اور 31 اگست کو شدید بارشوں سے سیلابی صورتحال کا خدشہ ہے۔

وسطی و جنوبی پنجاب (ملتان، ڈی جی خان، راجن پور، لیہ، بھکر، ساہیوال، بہاولپور، بہاولنگر، رحیم یار خان) میں بھی نشیبی علاقے زیرآب آنے کا امکان ہے۔

خیبر پختونخوا کے اضلاع (چترال، دیر، سوات، بونیر، مانسہرہ، ایبٹ آباد، پشاور، نوشہرہ، مردان، ڈی آئی خان، ٹانک، کوہاٹ، بنوں) میں 29 تا 31 اگست بارشوں کے دوران لینڈ سلائیڈنگ کا خدشہ ہے، خاص طور پر ملاکنڈ و ہزارہ ڈویژن میں۔

آزاد کشمیر (مظفرآباد، باغ، حویلی، کوٹلی، میرپور، بھمبر) اور گلگت بلتستان (گلگت، اسکردو، ہنزہ، دیامر، استور، غذر، گانچھے) میں بھی بارشوں اور لینڈ سلائیڈنگ کے ساتھ ساتھ گلیشیائی جھیلوں کے پھٹنے (GLOF) کا خطرہ ہے۔

سندھ کے ساحلی اضلاع (کراچی، ٹھٹھہ، سجاول، بدین، تھرپارکر) میں 30 اگست تا 2 ستمبر تک بارشیں متوقع ہیں، کراچی میں شہری سیلاب کا خدشہ ظاہر کیا گیا ہے۔ اندرون سندھ کے اضلاع (حیدرآباد، دادو، سکھر، گھوٹکی، لاڑکانہ، جیکب آباد، کشمور) میں بھی موسلا دھار بارشوں کی پیش گوئی کی گئی ہے۔

بلوچستان کے ساحلی و مشرقی اضلاع (گوادر، کیچ، پنجگور، خضدار، لسبیلہ، قلات) میں بھی 29 اگست سے یکم ستمبر تک بارشیں اور نشیبی علاقوں میں سیلابی صورتحال کا امکان ہے۔

این ڈی ایم اے نے ہدایت کی ہے کہ شہری ایمرجنسی کی صورت میں فوری طور پر مقامی انتظامیہ اور ریسکیو اداروں سے رابطہ کریں۔ اتھارٹی نے کہا کہ امدادی کارروائیاں اور نگرانی مسلسل جاری ہے تاکہ کسی بھی ہنگامی صورتحال سے بروقت نمٹا جا سکے۔