ابھیشیک بچن کے فلمی سفر کے 25 سال مکمل، پہلی بار بہترین اداکار کا فلم فیئر ایوارڈ حاصل

بالی ووڈ اداکار ابھیشیک بچن نے فلم انڈسٹری میں 25 سال مکمل ہونے پر اپنے کیریئر کا سب سے بڑا اعزاز حاصل کر لیا۔ انہیں 70 ویں فلم فیئر ایوارڈز 2025 میں فلم ’آئی وانٹ ٹو ٹاک‘ میں شاندار اداکاری پر بہترین اداکار کے ایوارڈ سے نوازا گیا۔

ایوارڈ وصول کرتے وقت جذباتی مناظر دیکھنے میں آئے۔ ابھیشیک بچن کی آنکھیں نم ہو گئیں اور انہوں نے کہا،’’اس سال میرے فلمی سفر کو 25 سال ہو گئے ہیں، اور یہ ہمیشہ میرا خواب رہا ہے کہ میں یہ ایوارڈ اپنے خاندان کے سامنے وصول کروں۔‘‘

اداکار نے اپنی کامیابی کا سہرا اپنی اہلیہ ایشوریا رائے بچن اور بیٹی آردھیا کو دیا۔ انہوں نے کہا،’’ایشوریا اور آردھیا، تم دونوں کا شکریہ کہ تم نے مجھے میرے خواب پورے کرنے کی اجازت دی۔ تمہاری قربانیاں ہی میری کامیابی کی بنیاد ہیں۔‘‘

ابھیشیک بچن نے یہ ایوارڈ اپنے والد امیتابھ بچن اور بیٹی آردھیا کے نام کرتے ہوئے کہا،’’یہ ایوارڈ دو خاص لوگوں کے لیے ہے — میرے ہیرو، میرے والد، اور میری دوسری ہیرو، میری بیٹی آردھیا۔‘‘

انہوں نے ان تمام ہدایتکاروں اور پروڈیوسرز کا شکریہ ادا کیا جنہوں نے ان پر اعتماد کرتے ہوئے انہیں فلموں میں موقع دیا۔

ان کے مطابق،’’یہ سفر آسان نہیں تھا، مگر ہر لمحہ فخر کا باعث رہا۔‘‘

ابھیشیک حال ہی میں ’ہاؤس فل 5‘ میں اکشے کمار، رتیش دیش مکھ، سونم باجوہ اور جیکولین فرنینڈس کے ساتھ نظر آئے، جبکہ ان کی اگلی فلم ’کنگ‘ میں وہ شاہ رخ خان اور سوہانا خان کے ساتھ اسکرین شیئر کریں گے۔

یہ ایوارڈ ان کے طویل اور کامیاب کیریئر کا ایک تاریخی سنگ میل قرار دیا جا رہا ہے۔