ملک کے بیشتر علاقوں میں خشک موسم، بعض مقامات پر بارش اور ژالہ باری کا امکان

محکمہ موسمیات کے مطابق آئندہ 24 گھنٹوں کے دوران ملک کے بیشتر حصوں میں موسم گرم اور خشک رہے گا تاہم منگل کے روز خیبرپختونخوا، اسلام آباد، بالائی پنجاب، کشمیر اور گلگت بلتستان میں بارش، آندھی اور گرج چمک کی پیش گوئی کی گئی ہے۔ بعض مقامات پر موسلادھار بارش اور ژالہ باری بھی ہو سکتی ہے۔

محکمہ موسمیات نے خبردار کیا ہے کہ تیز ہواؤں، آندھی اور ژالہ باری کے باعث روزمرہ معمولات متاثر ہو سکتے ہیں جبکہ کچے مکانات، دیواریں، بجلی کے کھمبے، بل بورڈز، گاڑیاں اور سولر پینل کو نقصان پہنچنے کا خدشہ ہے۔

مزید بتایا گیا ہے کہ شدید بارش کے نتیجے میں خیبرپختونخوا کے پہاڑی علاقوں، گلگت بلتستان، مری، گلیات اور کشمیر میں لینڈ سلائیڈنگ کا خطرہ بھی موجود ہے، اس لیے مسافروں اور سیاحوں کو محتاط رہنے اور سفر کے انتظامات موسمی حالات کے مطابق کرنے کی ہدایت دی گئی ہے۔

گزشتہ 24 گھنٹوں کے دوران ملک کے بیشتر علاقوں میں موسم گرم اور خشک رہا تاہم کشمیر کے چند مقامات پر بارش ہوئی، سب سے زیادہ بارش مظفرآباد میں ریکارڈ کی گئی جہاں سٹی میں 6 ملی میٹر اور ایئرپورٹ پر 4 ملی میٹر بارش ہوئی۔ پیر کو سب سے زیادہ درجہ حرارت دالبندین، نوکنڈی اور سبی میں ریکارڈ کیا گیا۔