کراچی میں گرمی کی واپسی، آئندہ دنوں میں موسم مزید گرم اور مرطوب رہنے کا امکان

کراچی میں کئی ہفتوں کے معتدل موسم کے بعد گرمی نے دوبارہ شدت اختیار کر لی ہے۔ تیز دھوپ اور صاف آسمان کے باعث حدت میں اضافہ محسوس کیا جا رہا ہے، اور شہریوں کو آئندہ دنوں میں مزید گرم اور مرطوب موسم کا سامنا کرنا پڑ سکتا ہے۔

محکمہ موسمیات کے ارلی وارننگ سینٹر کے مطابق آئندہ تین روز کے دوران شہر کا زیادہ سے زیادہ درجہ حرارت 36 ڈگری سینٹی گریڈ تک پہنچنے کا امکان ہے، جبکہ کم سے کم درجہ حرارت 27 سے 28 ڈگری سینٹی گریڈ کے درمیان رہنے کی پیش گوئی کی گئی ہے۔

موسمیاتی رپورٹ کے مطابق دن کے ابتدائی حصے میں شمال مغربی ہوائیں چلیں گی، جو بعد ازاں سمندر کی جنوب مغربی سمت سے آنے والی ہواؤں میں تبدیل ہو جائیں گی۔

 صبح کے وقت ہوا میں نمی کا تناسب 90 فیصد تک پہنچنے کا امکان ہے، جبکہ شام کے وقت یہ تناسب 65 فیصد تک رہ سکتا ہے، جس سے گرمی کی شدت میں مزید اضافہ ہو سکتا ہے۔

محکمہ موسمیات نے یہ بھی بتایا ہے کہ صوبہ سندھ کے بیشتر علاقوں میں بھی موسم گرم اور مرطوب رہنے کا امکان ہے، تاہم بارش کی کوئی پیش گوئی نہیں کی گئی۔

 شہریوں کو مشورہ دیا گیا ہے کہ وہ گرمی سے بچاؤ کے لیے مناسب احتیاطی تدابیر اختیار کریں اور غیر ضروری طور پر دھوپ میں نکلنے سے گریز کریں۔