کاروبار - 13 اکتوبر 2025
دلجیت دوسانجھ نے فلم پر پابندی کو غیر منصفانہ قرار دے دیا

انٹرٹینمنٹ - 27 ستمبر 2025
بالی ووڈ کے معروف پنجابی اداکار دلجیت دوسانجھ نے ملائیشیا میں اپنے کنسرٹ کے دوران بھارتی حکومت اور میڈیا پر سخت تنقید کرتے ہوئے اپنی فلم ’سردار جی 3‘ پر لگنے والی پابندی کو غیر منطقی اور غیر منصفانہ قرار دیا۔ انہوں نے اس بات پر حیرت کا اظہار کیا کہ ان کی فلم پر تو پابندی عائد کر دی گئی، لیکن ایشیا کپ 2025 بدستور جاری ہے۔
دلجیت نے اپنے مداحوں سے گفتگو کرتے ہوئے واضح کیا کہ ان کی فلم فروری میں شوٹ کی گئی تھی، جبکہ پہلگام واقعہ اپریل میں پیش آیا۔ ان کا کہنا تھا کہ سب چاہتے ہیں کہ مجرموں کو سزا ملے، لیکن ان کی فلم حملے سے پہلے بنائی گئی تھی، جبکہ کرکٹ میچز اسی وقت بھی منعقد ہو رہے ہیں۔
کنسرٹ کے دوران جب انہوں نے ایک شخص کو بھارتی پرچم لہراتے دیکھا تو انہوں نے کہا، ’’یہ میرے ملک کا پرچم ہے، جس کے لیے ہمیشہ عزت رہے گی۔‘‘ تاہم انہوں نے بھارتی میڈیا پر تنقید کرتے ہوئے کہا کہ میڈیا انہیں غدار وطن قرار دینے میں کوئی کسر نہیں چھوڑ رہا، حالانکہ پنجابی اور سکھ کبھی اپنے ملک کے خلاف نہیں جا سکتے۔
یاد رہے کہ پہلگام واقعے کے بعد فلم فیڈریشن آف انڈیا نے ’سردار جی 3‘ پر پابندی اور دلجیت دوسانجھ کے بائیکاٹ کا مطالبہ کیا تھا۔ اگرچہ فلم بھارت میں ریلیز نہیں ہو سکی، لیکن عالمی سطح پر اسے بھرپور کامیابی حاصل ہوئی۔
دلجیت کا یہ بیان ایسے وقت میں سامنے آیا ہے جب بھارت اور پاکستان کے درمیان کشیدگی کے باوجود ایشیا کپ جیسے بین الاقوامی کرکٹ ٹورنامنٹس جاری ہیں۔ انہوں نے اپنے بیان میں ان دونوں معاملات میں پائے جانے والے تضاد کی نشاندہی کی۔
اداکار نے زور دے کر کہا کہ وہ ہمیشہ اپنے ملک کے وفادار رہیں گے، لیکن انصاف کا تقاضا ہے کہ تمام معاملات میں یکساں معیار اپنایا جائے۔ ان کا یہ مؤقف بھارتی میڈیا اور حکومتی پالیسیوں پر سوال اٹھاتا ہے۔