چیمپئنز لیگ میں پی ایس جی کے خلاف بارسلونا کے لامین یامل کی بیلن ڈی اور کی دوڑ کا آغاز

بارسلونا کے کم عمر اسٹار لامین یامل بدھ کو اولمپک اسٹیڈیم میں پیرس سینٹ جرمن کے خلاف چیمپئنز لیگ میچ سے اپنی بیلن ڈی اور کی مہم کا آغاز کریں گے۔

 18 سالہ یامل گزشتہ ہفتے تاریخ کا سب سے کم عمر فاتح بننے سے محروم رہے، یہ اعزاز پی ایس جی کے عثمان ڈیمبیلے نے حاصل کیا، جو اب انجری کے باعث باہر ہیں۔

گزشتہ سیزن میں یامل نے بارسلونا کو چیمپئنز لیگ کے سیمی فائنل تک پہنچانے میں مرکزی کردار ادا کیا اور اب عزم ظاہر کیا ہے کہ وہ 2015 کے بعد پہلی بار یہ ٹرافی کلب کو واپس دلائیں گے۔

 انجری سے واپسی پر ریال سوسائیڈاڈ کے خلاف ان کا شاندار کھیل—جس میں انہوں نے محض ایک منٹ میں لیوانڈووسکی کو فیصلہ کن گول کے لیے اسسٹ دیا—ان کی غیر معمولی صلاحیت کا ثبوت ہے۔

صرف 18 برس کی عمر میں یامل بارسلونا کے لیے 100 سے زائد میچ کھیل چکے ہیں، دو لالیگا ٹائٹل جیت چکے ہیں اور لیجنڈز کا مشہور نمبر 10 جرس بھی سنبھال چکے ہیں۔

 میسی، میراڈونا اور رونالڈینیو کے نقشِ قدم پر چلتے ہوئے یامل کو بارسلونا کا مستقبل قرار دیا جا رہا ہے، اور پی ایس جی کے خلاف یہ میچ ان کے بیلن ڈی اور سفر کا پہلا بڑا امتحان ہو سکتا ہے۔