میزان بینک کی کامیابی پر مبنی کتاب کی تقریب رونمائی

میزان بینک کی کامیابی کی داستان پر مبنی سبطین نقوی کی کتاب Unconventional — The Bank No One Saw Coming کی تقریبِ رونمائی جمعہ کی شام ایک مقامی ہوٹل میں منعقد ہوئی۔

تقریب میں سابق گورنر اسٹیٹ بینک ڈاکٹر عشرت حسین نے کلیدی خطاب کیا اور مصنف کو پانچ سال تک مواد جمع کرنے پر خراجِ تحسین پیش کیا۔ انہوں نے کہا کہ میزان بینک کا سفر صرف ایک ادارے کی تبدیلی نہیں بلکہ پاکستان کے مالیاتی منظرنامے کی ازسرنو تشکیل ہے۔

ڈاکٹر عشرت حسین نے میزان بینک کی کامیابی سے حاصل ہونے والے تین اہم اسباق گنوائے: بینکنگ انڈسٹری کے لیے ایک ماڈل، اسلامی بینکنگ میں پیش قدمی، اور قیادت و افرادی قوت کی ترقی۔

انہوں نے کہا کہ 2002 میں صفر سے آغاز کرنے والا یہ بینک بہت کم عرصے میں پاکستان کے بڑے مالیاتی اداروں میں شامل ہو گیا اور اپنے حریفوں کو پیچھے چھوڑ دیا۔ انہوں نے عرفان صدیقی کی قیادت کو نایاب قرار دیا جو حکمتِ عملی اور مؤثر عملدرآمد دونوں صلاحیتوں کے حامل ہیں۔

اسلامی بینکنگ پر بات کرتے ہوئے ڈاکٹر عشرت حسین نے کہا کہ یہ صرف مذہبی فریضہ ہی نہیں بلکہ معاشی ضرورت بھی ہے۔ روایتی بینکاری میں تمام بوجھ قرض لینے والے پر ڈال دیا جاتا ہے جبکہ اسلامی بینکنگ مساوات، شراکت اور انصاف کو فروغ دیتی ہے۔ یہ غربت کے خاتمے، چھوٹے کسانوں کی معاونت اور انسانی سرمائے میں سرمایہ کاری میں مدد دیتی ہے، اور سرمایہ داری و اشتراکیت کے برعکس ایک متوازن راستہ فراہم کرتی ہے۔

انہوں نے مزید کہا کہ میزان بینک کی ترقی صرف قیادت کا نتیجہ نہیں بلکہ ٹیم ورک کی مرہون منت ہے۔ ملازمین نے معمول کے دفتری رویے کے بجائے عزم اور مشن کے جذبے کے ساتھ کام کیا، جس نے اسے ایک تحریک بنا دیا۔

مصنف سبطین نقوی نے کہا کہ میزان بینک کی تاریخ لکھنا ان کے لیے اعزاز کی بات تھی۔ انہوں نے بتایا کہ پہلی بار انہوں نے میزان کا نام بحیثیت طالب علم آئی بی اے میں سنا تھا، جب ان کے استاد نے بغیر سود کے قرض کی بات کی۔ ان کے مطابق، اس وقت یہ تصور ناقابلِ یقین تھا کہ کوئی بینک سود لیے بغیر قرض دے سکتا ہے۔

انہوں نے کہا کہ 2008 کے مالیاتی بحران میں جب دنیا کے بڑے بینک ڈھے گئے تو اسلامی بینک کافی حد تک محفوظ رہے، جس سے یہ حقیقت سامنے آئی کہ اسلامی بینکاری نہ صرف مذہبی انتخاب ہے بلکہ ایک مضبوط کاروباری فیصلہ بھی ہے۔ انہوں نے کہا کہ میزان بینک کا عروج ناگزیر تھا کیونکہ تاجر، دکاندار اور پیشہ ور افراد سب اس پر اعتماد کرتے تھے۔ ان کے مطابق، عرفان صدیقی کی کہانی میزان بینک سے الگ نہیں کی جا سکتی۔

تقریب میں پینل ڈسکشنز بھی شامل تھے جن میں میزان بینک کے صدر عرفان صدیقی اور موجودہ گورنر اسٹیٹ بینک جمیل احمد نے اظہارِ خیال کیا۔