اکتوبر میں سال کا پہلا سپر مون 7 تاریخ کو نظر آئے گا

ماہرینِ فلکیات کے مطابق اکتوبر کا مہینہ آسمانی نظاروں کے شوقین افراد کے لیے خاص ہوگا کیونکہ رواں سال کا پہلا پورا چاند، جسے سپر مون بھی کہا جاتا ہے، 7 اکتوبر کو دکھائی دے گا۔

پاکستان اسپیس اینڈ اپر ایٹموسفیئر ریسرچ کمیشن (سپارکو) کے مطابق سپر مون نہ صرف پاکستان بلکہ دنیا بھر میں دیکھا جا سکے گا۔ اس سال مزید دو سپر مون بھی 5 نومبر اور 5 دسمبر کو نظر آئیں گے۔

ماہرین کے مطابق سپر مون اُس وقت ظاہر ہوتا ہے جب چاند اپنی گردش کے دوران زمین کے قریب ترین فاصلے پر ہوتا ہے۔ اس وقت چاند عام دنوں کے مقابلے میں تقریباً 14 فیصد بڑا اور 30 فیصد زیادہ روشن دکھائی دیتا ہے۔ 7 اکتوبر کی رات چاند زمین سے تقریباً 224,599 میل (361,400 کلومیٹر) کے فاصلے پر ہوگا۔

فلکیاتی ماہرین کے مطابق سپر مون سب سے زیادہ حسین منظر اس وقت پیش کرتا ہے جب وہ افق کے قریب طلوع ہوتا ہے، کیونکہ اس وقت وہ معمول سے کہیں زیادہ بڑا دکھائی دیتا ہے۔ اس سے قبل آخری سپر مون نومبر 2024 میں دیکھا گیا تھا۔