ویمنز ورلڈ کپ: بھارت نے پاکستان کو 88 رنز سے شکست دے دی

انٹرنیشنل کرکٹ کونسل (آئی سی سی) ویمنز ورلڈ کپ 2025ء کے چھٹے میچ میں بھارتی ٹیم نے پاکستانی ٹیم کو 88 رنز سے شکست دے دی۔ کولمبو میں کھیلے گئے اس میچ میں دونوں ٹیموں کے درمیان ورلڈ کپ کی تاریخ کا سب سے بڑا مجموعی اسکور بھی بنا۔

آئی سی سی ویمنز ورلڈ کپ میں بھارت کی پاکستان کے خلاف بڑی فتح، میچ میں نیا مجموعی ریکارڈ قائم

بھارتی ٹیم کے 248 رنز کے ہدف کے تعاقب میں پاکستانی ٹیم 159 رنز پر ڈھیر ہو گئی۔ پاکستان کی جانب سے سدرہ امین نے 81 رنز کی نمایاں اننگز کھیلی، جبکہ نتالیہ پرویز نے 33 اور سدرہ نواز نے 14 رنز بنائے؛ دیگر کوئی کھلاڑی ڈبل فیگر میں داخل نہ ہو سکی۔

بھارت کی طرف سے کرانتی گاؤڈ اور دپتی شرما نے 3، 3 وکٹیں حاصل کیں جبکہ سنہے رانا نے 2 وکٹیں اپنے نام کیں۔ دونوں ٹیموں کے درمیان میچ میں مجموعی طور پر 406 رنز بنے ہیں، جو ورلڈ کپ کی تاریخ میں پاکستان اور بھارت کے میچز کا سب سے بڑا ٹوٹل ہے۔

اس سے قبل میچ میں بھارتی ویمنز ٹیم 50 ویں اوور کی آخری گیند پر 247 رنز پر آل آؤٹ ہو گئی تھی۔ یہ پہلا موقع ہے کہ پاکستان ویمنز ٹیم نے 1 روزہ کرکٹ میں بھارتی ٹیم کو آل آؤٹ کیا ہے۔ بھارت کی طرف سے ہرلین دیول نے سب سے زیادہ 46 رنز کی اننگز کھیلی۔

پاکستانی بولرز میں ڈائنا بیگ نے 4، سعدیہ اقبال اور فاطمہ ثناء نے 2، 2 جبکہ نشرح سدھو اور رامین شمیم نے 1، 1 وکٹ حاصل کی۔

پاکستان نے ٹاس جیت کر پہلے فیلڈنگ کا فیصلہ کیا تھا۔ ٹاس کے موقع پر فاطمہ ثناء نے کہا تھا کہ ٹیم کوالیفائر میں اچھا کر چکی ہے اور آج بھی بہتر پرفارم کرے گی۔ خبر کے ساتھ یہ بیان بھی شامل تھا کہ "بھارت نے ویمنز ورلڈ کپ بھی سیاست کی نذر کر دیا ہے۔"