پی سی بی نے 2024-25 سیزن کے لیے میچ آفیشلز پینل کا اعلان کر دیا

پاکستان کرکٹ بورڈ (پی سی بی) نے 2024-25 کے سیزن کے لیے میچ آفیشلز کے پینل کا اعلان کر دیا ہے۔

پی سی بی کے مطابق انٹرنیشنل پینل میں میچ ریفری علی نقوی اور امپائرز آصف یعقوب، فیصل آفریدی، راشد ریاض اور سلیمہ امتیاز شامل ہیں۔

ایلیٹ پینل میں 18 امپائرز اور 10 میچ ریفری شامل ہیں، جب کہ امپائرز کی کارکردگی کا باریک بینی سے جائزہ لینے کے لیے سپلیمنٹری پینلز کو دو حصوں میں تقسیم کیا گیا ہے۔ سپلیمنٹری پینل 1 میں 14 اور سپلیمنٹری پینل 2 میں 24 امپائرز شامل ہیں، جب کہ میچ ریفریز کے سپلیمنٹری پینل میں 10 ریفری شامل کیے گئے ہیں۔

ایمرجنگ پینل میں ملک بھر سے 40 امپائرز کو شامل کیا گیا ہے جن میں سلیمہ امتیاز سمیت 13 خواتین امپائرز بھی شامل ہیں۔

پی سی بی کے مطابق میچ آفیشلز پینل کی تشکیل کا مقصد ملک بھر میں امپائرز اور میچ ریفریز کی کارکردگی کے معیار کو مزید بہتر بنانا ہے۔