پنجاب میں دریاؤں کے بہاؤ میں اضافہ، ستلج اور راوی میں نچلے درجے کا سیلاب، پی ڈی ایم اے کا الرٹ جاری

پراونشل ڈیزاسٹر مینجمنٹ اتھارٹی (پی ڈی ایم اے) پنجاب نے حالیہ بارشوں کے باعث دریاؤں میں پانی کے بہاؤ میں اضافے کا الرٹ جاری کر دیا ہے، جس کے بعد ستلج اور راوی میں ایک بار پھر نچلے درجے کا سیلاب پیدا ہو گیا ہے۔

ترجمان پی ڈی ایم اے کے مطابق دریائے جہلم میں منگلا اپ اسٹریم پر پانی کی سطح میں اضافہ متوقع ہے، جس کے نتیجے میں آئندہ 24 گھنٹوں میں درمیانے درجے کا سیلاب آسکتا ہے۔

دریائے ستلج میں گنڈا سنگھ والا اور دریائے راوی میں ہیڈ سدھنائی کے مقام پر نچلے درجے کا سیلاب ریکارڈ کیا گیا ہے۔

دوسری جانب ضلع بہاولپور میں بدترین سیلاب گزرنے کے باوجود تباہی کے آثار اب بھی نمایاں ہیں۔ سیلابی ریلے سے ہزاروں مکانات منہدم اور لاکھوں ایکڑ پر کھڑی فصلیں تباہ ہو چکی ہیں۔ اب وہاں مچھروں کی بھرمار ہے جو مختلف بیماریوں کے پھیلاؤ کا باعث بن رہی ہے۔

ملتان کی تحصیل جلال پور پیر والا میں بھی پانی کی نکاسی کا عمل جاری ہے، تاہم کئی نشیبی علاقے اب تک زیرِ آب ہیں۔

نوراجہ بھٹہ بند میں پڑنے والے تمام سات شگاف مکمل طور پر بند کر دیے گئے ہیں۔ ادھر سیلاب سے متاثرہ موٹروے M5 تاحال بند ہے اور 25 روز گزرنے کے باوجود بحالی کا عمل شروع نہیں ہو سکا۔

حکام کے مطابق موٹروے کا 23 کلومیٹر طویل حصہ 13 سے زائد مقامات سے متاثر ہوا ہے۔ مرمت و بحالی کا کام جلد شروع کیا جائے گا جبکہ فی الحال متبادل راستوں سے ٹریفک کو رواں رکھا جا رہا ہے۔