رجب بٹ ایک بار پھر خبروں میں: فاطمہ خان سے مبینہ تعلقات پر خاموشی توڑ دی

مشہور یوٹیوبر اور ولاگر رجب بٹ ایک بار پھر سوشل میڈیا کی توجہ کا مرکز بن گئے ہیں۔ متنازع بیانات، جھگڑوں اور قانونی معاملات کے باعث خبروں میں رہنے والے رجب بٹ اس بار اپنی ذاتی زندگی سے متعلق افواہوں کی وجہ سے زیرِ بحث ہیں۔

اس وقت رجب بٹ برطانیہ میں مقیم ہیں، جہاں ان کے خلاف مختلف مقدمات زیرِ سماعت ہیں۔ حال ہی میں وہ ایک پوڈکاسٹ میں شریک ہوئے، جہاں ان سے متعدد ذاتی سوالات پوچھے گئے۔ سب سے زیادہ توجہ حاصل کرنے والا سوال ان کے اور مشہور ٹک ٹاکر فاطمہ خان کے مبینہ تعلقات سے متعلق تھا۔

یاد رہے کہ کچھ عرصہ قبل فاطمہ خان نے دعویٰ کیا تھا کہ ان کا رجب بٹ سے تعلق رہا ہے، حتیٰ کہ انہوں نے مبینہ تحائف بھی سوشل میڈیا پر شیئر کیے تھے۔ تاہم، رجب بٹ نے ان الزامات کی سختی سے تردید کرتے ہوئے کہا کہ ’’یہ سب جھوٹا پروپیگنڈا ہے، فاطمہ خان کے پاس کوئی ثبوت، پیغامات یا رسیدیں نہیں ہیں۔‘‘

جب میزبان نے ان سے ان کی اہلیہ ایمان کے ردِعمل کے بارے میں سوال کیا تو رجب بٹ نے مسکراتے ہوئے کہا، ’’ایمان کو ان باتوں سے کوئی فرق نہیں پڑتا، وہ جانتی ہیں کہ ہمارے رشتے میں ان کی کتنی اہمیت ہے۔‘‘

انہوں نے مزید کہا کہ ایمان ہر مشکل وقت میں ان کے ساتھ کھڑی رہتی ہیں اور دونوں کے درمیان مکمل اعتماد کا رشتہ ہے۔

رجب بٹ کا یہ انٹرویو سامنے آتے ہی سوشل میڈیا پر تیزی سے وائرل ہوگیا۔ مداحوں کی جانب سے مختلف آرا سامنے آ رہی ہیں ، کچھ صارفین ان کے اعتماد اور صاف گوئی کو سراہ رہے ہیں، جبکہ بعض اب بھی فاطمہ خان کے الزامات پر شکوک و شبہات کا اظہار کر رہے ہیں۔