اسرائیلی بحریہ کا غزہ کے لیے امداد لے جانے والے فریڈم فلوٹیلا پر حملہ، تین جہاز قبضے میں لے لیے گئے

اسرائیلی بحریہ نے غزہ کے لیے امدادی سامان لے جانے والے فریڈم فلوٹیلا پر حملہ کرتے ہوئے تین جہازوں پر قبضہ کر لیا ہے۔

غیر ملکی خبر ایجنسیوں کے مطابق، یہ حملہ اسرائیلی ناکہ بندی کے زون سے تقریباً 120 ناٹیکل میل دور بین الاقوامی پانیوں میں کیا گیا۔

فلوٹیلا کے منتظمین نے سوشل میڈیا پلیٹ فارم ایکس (سابقہ ٹوئٹر) پر بتایا کہ ’’غزہ سے 120 ناٹیکل میل کے فاصلے پر اسرائیل نے ہمارے امدادی قافلے پر حملہ کیا، اور فی الحال کم از کم تین جہاز اسرائیلی فورسز کے قبضے میں ہیں‘‘۔
 

ان کے مطابق، اسرائیلی حکام نے لائیو نشریات منقطع کر دی ہیں تاکہ کارروائی کی تفصیلات سامنے نہ آسکیں۔

دوسری جانب اسرائیلی وزارتِ خارجہ نے اپنے بیان میں کہا ہے کہ ’’تمام جہازوں اور ان میں سوار افراد محفوظ ہیں، انہیں اسرائیلی بندرگاہ منتقل کیا جا رہا ہے اور جلد اپنے وطن واپس بھیج دیا جائے گا‘‘۔

یاد رہے کہ چند روز قبل ہی اسرائیل نے گلوبل صمود فلوٹیلا پر بھی حملہ کیا تھا، جس میں 500 سے زائد امدادی کارکنوں کو حراست میں لیا گیا تھا، بعد ازاں زیادہ تر کو رہا کر دیا گیا، جن میں پاکستان کے سابق سینیٹر مشتاق احمد بھی شامل تھے۔

تجزیہ کاروں کے مطابق، غزہ کے لیے امدادی قافلوں پر اسرائیلی حملے انسانی بنیادوں پر کام کرنے والی تنظیموں کے لیے سنگین خطرہ ہیں اور عالمی برادری کی خاموشی ایک بڑا سوالیہ نشان بن چکی ہے۔