کراچی کا درجہ حرارت تین ڈگری کم، موسم میں خوشگوار تبدیلی

کراچی: موسمیاتی تبدیلی کے اثرات کے باعث شہرِ قائد کے درجہ حرارت میں نمایاں کمی ریکارڈ کی گئی ہے۔ محکمہ موسمیات کے مطابق گزشتہ روز کے مقابلے میں کراچی کا کم سے کم درجہ حرارت 3 ڈگری سینٹی گریڈ کم ہو کر 23 ڈگری سینٹی گریڈ ریکارڈ ہوا۔

محکمہ موسمیات کا کہنا ہے کہ آج دن کے وقت موسم گرم اور مرطوب جبکہ مطلع صاف رہے گا، تاہم رات کے اوقات میں درجہ حرارت مزید کم ہونے کا امکان ہے۔

آج کراچی میں زیادہ سے زیادہ درجہ حرارت 34 سے 36 ڈگری سینٹی گریڈ تک رہنے کی توقع ہے، جبکہ گزشتہ روز شہر کا زیادہ سے زیادہ درجہ حرارت 35 ڈگری سینٹی گریڈ ریکارڈ کیا گیا تھا۔

شہر میں 10 سے 25 کلومیٹر فی گھنٹہ کی رفتار سے مختلف سمتوں سے ہوائیں چلنے کا امکان ہے۔ آئندہ 24 گھنٹوں کے دوران ہوا میں نمی کا تناسب 45 سے 80 فیصد تک رہنے کی پیش گوئی کی گئی ہے۔