اسلام آباد ہائی کورٹ نے توہینِ مذہب کیس میں گرفتار ملزم کی ضمانت مسترد کر دی، ٹرائل دو ماہ میں مکمل کرنے کا حکم

 اسلام آباد ہائی کورٹ نے توہینِ مذہب کیس میں گرفتار ملزم حسن عابد کی درخواستِ ضمانت مسترد کر دی اور ٹرائل کورٹ کو ہدایت کی ہے کہ کیس کا فیصلہ دو ماہ کے اندر مکمل کیا جائے۔

جسٹس محسن اختر کیانی نے کیس کی سماعت کے دوران فیصلہ سناتے ہوئے کہا کہ عدالتی عمل میں غیر ضروری تاخیر برداشت نہیں کی جا سکتی۔

ملزم کے وکیل ہادی علی ایڈووکیٹ نے مؤقف اپنایا کہ عدالت نے 8 اکتوبر کو ڈی جی این سی سی آئی اے کو تمام گواہان پیش کرنے کا حکم دیا تھا، تاہم کچھ گواہان عدالت میں پیش نہیں ہوئے۔

 ان کا کہنا تھا کہ جو گواہ عدالت آئے، ان پر جرح مکمل کر لی گئی ہے، جبکہ تفتیشی افسر کی عدم حاضری سے کیس میں تاخیر ہو رہی ہے۔

اس موقع پر وکیل عادل عزیز قاضی نے مؤقف اختیار کیا کہ تفتیشی افسر دونوں سماعتوں پر موجود رہا ہے۔

عدالت نے استفسار کیا کہ ملزم کب سے حراست میں ہے، جس پر وکیل نے بتایا کہ حسن عابد ایک سال اور سات ماہ سے زیرِ حراست ہیں۔

سماعت مکمل ہونے پر ہائی کورٹ نے درخواست ضمانت خارج کرتے ہوئے حکم دیا کہ ٹرائل کورٹ دو ماہ میں مقدمہ مکمل کر کے رپورٹ پیش کرے۔