امریکی صدر ڈونلڈ ٹرمپ کا پاک افغان سرحدی تنازع میں ثالثی کی پیشکش

امریکی صدر ڈونلڈ ٹرمپ نے اسرائیل جاتے ہوئے طیارے میں صحافیوں سے گفتگو کرتے ہوئے پاکستان اور افغانستان کی سرحد پر حالیہ کشیدگی کا ذکر کیا۔ صدر ٹرمپ نے کہا کہ "میں نے سنا ہے اب پاکستان اور افغانستان کے درمیان جنگ چل رہی ہے... میں پھر ایک اور کوشش کروں گا کیونکہ میں جنگیں حل کرنے میں ماہر ہوں"۔ انہوں نے اس بات کا اشارہ دیا کہ وہ واپس آکر صورتحال کا جائزہ لیں گے۔ صدر ٹرمپ نے یہ دعویٰ بھی کیا کہ پاکستان اور بھارت کے مابین جنگ کو محصولات (ٹیرف) کی دھمکی کی مدد سے روکا گیا تھا۔

ادھر، ذرائع کے مطابق پاک فوج نے افغان طالبان اور ان سے منسلک عسکریت پسندوں، جنہیں 'فتنہ الخوارج' کہا جاتا ہے، کے بلا اشتعال حملے کا بھرپور جواب دیا۔ اس جوابی کارروائی میں طالبان اور عسکریت پسندوں کی متعدد چوکیاں تباہ کر دی گئیں اور دشمن کی 21 پوزیشنز پر وقتی قبضہ کر لیا گیا۔ طالبان کے کیمپوں اور چوکیوں پر فضائی حملے اور زمینی کارروائیاں بھی کی گئیں۔ ذرائع نے تصدیق کی ہے کہ دو سو سے زائد طالبان اور متعلقہ جنگجو ہلاک ہوئے اور وہ اپنی چوکیاں اور کمین گاہیں چھوڑ کر بھاگ گئے۔ ان جھڑپوں میں وطن کے دفاع میں پاک فوج کے 23 بہادر جوانوں نے جام شہادت نوش کیا جبکہ 29 سپاہی زخمی ہوئے۔