کاروبار - 13 اکتوبر 2025
پاک فوج کی عالمی کامیابی — ‘کیمبرین پیٹرول 2025’ میں شاندار کارکردگی، گولڈ میڈل اپنے نام

پاکستان - 13 اکتوبر 2025
پاک فوج نے برطانیہ کے علاقے ویلز میں منعقد ہونے والی بین الاقوامی فوجی مشق ‘کیمبرین پیٹرول 2025’ میں شاندار کارکردگی دکھاتے ہوئے گولڈ میڈل جیت لیا۔ یہ مشق 3 سے 13 اکتوبر 2025 تک جاری رہی۔
یہ سالانہ عالمی فوجی مشق اپنی 66ویں قسط میں داخل ہوچکی ہے اور اسے دنیا کی سب سے مشکل اور پیشہ ورانہ فوجی مشقوں میں شمار کیا جاتا ہے۔
اس مقابلے میں حصہ لینے والی ٹیموں کو 48 گھنٹوں کے اندر تقریباً 60 کلومیٹر کا دشوار گزار فاصلہ طے کرتے ہوئے مختلف عسکری، حکمتِ عملی اور تکنیکی مشنز کامیابی سے مکمل کرنا ہوتے ہیں۔
سال 2025 کی مشق میں 36 ممالک کی 137 ٹیموں نے حصہ لیا۔ پاکستان آرمی کی ٹیم، جس کی قیادت کیپٹن محمد سعد نے کی، نے غیر معمولی مہارت اور پیشہ ورانہ صلاحیتوں کا مظاہرہ کرتے ہوئے گولڈ میڈل حاصل کیا۔
آئی ایس پی آر کے مطابق، پاک فوج کی یہ کامیابی پوری قوم کے لیے باعثِ فخر ہے۔ ترجمان نے کہا کہ پاکستان آرمی اپنی اعلیٰ تربیت، پیشہ ورانہ معیار اور غیر متزلزل عزم کی بدولت دنیا بھر میں ممتاز مقام رکھتی ہے۔
ترجمان کا مزید کہنا تھا کہ پاک فوج ہمیشہ قومی پرچم کو سربلند رکھتی آئی ہے اور مستقبل میں بھی اسی جذبے کے ساتھ ملک و قوم کا نام روشن کرتی رہے گی۔