قدرتی آفات سے نمٹنے کے لیے تمام ادارے ہر وقت تیار رہیں، وزیراعلیٰ پنجاب مریم نواز شریف

وزیراعلیٰ پنجاب مریم نواز شریف نے کہا ہے کہ انسانی زندگی کے تحفظ کے لیے قدرتی آفات سے نمٹنے کے لیے تمام اداروں کا ہمہ وقت تیار رہنا ضروری ہے۔

قدرتی آفات سے آگاہی اور بچاؤ کے عالمی دن کے موقع پر اپنے خصوصی پیغام میں مریم نواز نے کہا کہ بروقت تیاری سے قدرتی آفات کے دوران انسانی جان و مال اور ماحول کو تباہ کن نقصانات سے بچایا جا سکتا ہے۔

 انہوں نے کہا کہ قدرتی آفات کو روکا تو نہیں جا سکتا، تاہم ٹیکنالوجی، اشتراکِ عمل اور پیشگی منصوبہ بندی سے ان کے اثرات کو کم کیا جا سکتا ہے۔

وزیراعلیٰ پنجاب نے کہا کہ صوبے نے تاریخ کے سب سے بڑے سیلاب کا سامنا کیا، لیکن بروقت تیاری اور مربوط حکمتِ عملی کے باعث بڑے پیمانے پر ریسکیو، ریلیف اور انخلا آپریشن کامیابی سے مکمل کیے گئے۔ اگر پیشگی اقدامات نہ کیے جاتے تو بھاری جانی نقصان کا اندیشہ تھا۔

انہوں نے مزید کہا کہ پنجاب حکومت نے لاکھوں انسانی جانوں اور مویشیوں کو محفوظ بنایا، جبکہ بروقت میڈیکل کیمپس کے قیام سے متعدی امراض کے پھیلاؤ کو روکا گیا۔

مریم نواز شریف نے اس عزم کا اظہار کیا کہ حکومتِ پنجاب کے تمام ادارے سیلاب، زلزلے اور دیگر قدرتی آفات سے عوام کے تحفظ کے لیے مکمل طور پر متحرک اور سرگرم عمل ہیں۔