وزیراعظم شہباز شریف غزہ جنگ بندی امن سربراہ اجلاس میں شرکت کے لیے شرم الشیخ پہنچ گئے

وزیراعظم محمد شہباز شریف امریکی صدر ڈونلڈ ٹرمپ اور مصری صدر عبدالفتاح السیسی کی خصوصی دعوت پر مصر کے شہر شرم الشیخ پہنچ گئے ہیں۔ شرم الشیخ ایئرپورٹ پر وزیراعظم کا استقبال مصری یوتھ و اسپورٹس کے وزیر ڈاکٹر اشرف صبحی، مصر میں پاکستان کے سفیر عامر شوکت اور پاکستان و مصری سفارتی عملے کے اعلیٰ حکام نے کیا۔

وزیراعظم شرم الشیخ میں منعقد ہونے والے غزہ میں جنگ بندی کے لیے امن سربراہی اجلاس میں شرکت کریں گے۔ ان کے ہمراہ وفد میں نائب وزیراعظم و وزیر خارجہ محمد اسحاق ڈار اور وزیر اطلاعات و نشریات عطا اللہ تارڑ شامل ہیں۔

وزیراعظم امن معاہدے پر دستخط کی تقریب میں خصوصی طور پر شریک ہوں گے، جس پر امریکی صدر ڈونلڈ ٹرمپ، مصری صدر عبدالفتاح السیسی، امیر قطر شیخ تمیم بن حمد الثانی اور ترکیہ کے صدر رجب طیب ایردوان دستخط کریں گے۔