راشد خان نے وسیم اکرم اور ثقلین مشتاق کا ریکارڈ برابر کر دیا

افغانستان کے اسپنر راشد خان نے بنگلہ دیش کے خلاف دوسرے ون ڈے میں شاندار کارکردگی دکھاتے ہوئے 5 وکٹیں حاصل کیں اور اس کے ساتھ ہی سابق پاکستانی کپتان وسیم اکرم اور اسپنر ثقلین مشتاق کے ریکارڈ کی برابری کر لی۔

یہ چھٹی مرتبہ ہے کہ راشد خان نے ایک روزہ بین الاقوامی میچ میں 5 یا اس سے زائد وکٹیں حاصل کیں۔ اس سے قبل وسیم اکرم اور ثقلین مشتاق بھی پاکستان کی جانب سے 6، 6 مرتبہ یہ کارنامہ انجام دے چکے ہیں۔

راشد خان اب اُن کھلاڑیوں کی فہرست میں شامل ہو گئے ہیں جن میں بھارت کے محمد شامی، نیوزی لینڈ کے ٹرینٹ بولٹ، اور جنوبی افریقہ کے لانس کلوسنر شامل ہیں — یہ تمام کھلاڑی بھی 6 بار پانچ وکٹیں حاصل کر چکے ہیں۔

ون ڈے کرکٹ میں سب سے زیادہ پانچ وکٹیں لینے کا عالمی ریکارڈ پاکستان کے وقار یونس کے پاس ہے جنہوں نے 13 بار یہ کارنامہ سرانجام دیا۔ اُن کے بعد سری لنکا کے متھیا مرلی دھرن 10 بار کے ساتھ دوسرے جبکہ مچل اسٹارک، بریٹ لی اور شاہد آفریدی 9، 9 بار کے ساتھ تیسرے نمبر پر ہیں۔