وفاقی حکومت کا بڑا ہدف: 5 سال میں ادویات کی برآمدات 30 ارب ڈالر تک پہنچانے کا عزم

   وفاقی حکومت نے پاکستان کی ادویات کی برآمدات کو اگلے پانچ سالوں میں 30 ارب امریکی ڈالر تک بڑھانے کا ہدف مقرر کر لیا ہے۔

اسلام آباد میں وفاقی وزیرِ صحت مصطفیٰ کمال کی زیرِ صدارت ڈریپ (DRAP) کا ایک اہم اجلاس منعقد ہوا، جس میں فیڈرل سیکرٹری ہیلتھ، ایڈیشنل سیکرٹری اور ڈریپ کے چیف ایگزیکٹیو آفیسر بھی شریک ہوئے۔

اجلاس کے دوران برآمداتی اہداف پر پیش رفت کا تفصیلی جائزہ لیا گیا۔ وزیرِ صحت نے کہا کہ حکومت نے ادویات کی ایکسپورٹس بڑھانے کے لیے بھرپور حکمتِ عملی تیار کی ہے اور اس ہدف کے حصول کے لیے تمام ممکنہ اقدامات کو یقینی بنایا جا رہا ہے۔

مصطفیٰ کمال نے زور دیا کہ پاکستانی فارماسیوٹیکل مصنوعات کو دنیا کے بڑے تجارتی بلاکس تک رسائی دلانے کے لیے مربوط اقدامات جاری ہیں۔ انہوں نے کہا کہ یہ منصوبہ صرف ایک عددی ہدف نہیں بلکہ پاکستان کی معاشی خود کفالت اور پائیدار ترقی کی علامت ہے۔

وزیرِ صحت نے مزید بتایا کہ منصوبے کی رفتار برقرار رکھنے اور پیش رفت کا تسلسل یقینی بنانے کے لیے باقاعدہ فالو اپ میٹنگز منعقد کی جائیں گی۔