بھارتی اپوزیشن کا الزام: بہار انتخابات جیتنے کیلئے 14 ہزار کروڑ روپے کا غلط استعمال کیا گیا

بھارتی اپوزیشن جماعت نے الزام لگایا ہے کہ بہار اسمبلی انتخابات میں حکومتی اتحاد نے 14 ہزار کروڑ روپے کا ناجائز استعمال کرکے کامیابی حاصل کی۔

بھارتی میڈیا کے مطابق جَن سوراج پارٹی کا کہنا ہے کہ وزیراعلیٰ نتیش کمار کی حکومت نے عالمی بینک سے لیے گئے 14 ہزار کروڑ کے قرض سمیت مجموعی 40 ہزار کروڑ روپے عوام کو رقوم دینے اور ووٹ خریدنے کے لیے استعمال کیے۔

پارٹی کے قومی صدر ادے سنگھ نے پریس کانفرنس میں بتایا کہ انتخابی شیڈول کے اعلان کے بعد حکومت نے ’’مکھیا منتری مہیلا روزگار یوجنا‘‘ کے تحت ہر خاتون کو 10 ہزار روپے منتقل کیے، اور یہ ادائیگیاں پولنگ سے ایک دن پہلے تک جاری رہیں۔

واضح رہے کہ بہار کے ریاستی انتخابات میں حکمران اتحاد نے بھاری اکثریت سے کامیابی حاصل کی۔

نتائج کے مطابق بی جے پی اور جے ڈی یو کے اتحاد ’این ڈی اے‘ نے 243 میں سے 203 نشستیں جیتیں جبکہ ایم جی بی کو 34 اور دیگر جماعتوں کو 6 سیٹیں ملیں۔