سلامتی کونسل میں ٹرمپ غزہ پلان کی منظوری ‘ پاکستان کا خیرمقدم، اسرائیلی انخلاء اور خودمختار فلسطینی ریاست کا مطالبہ

اقوام متحدہ میں پاکستان کے مندوب عاصم افتخار نے سلامتی کونسل میں اپنے خطاب کے دوران کہا کہ پاکستان نے غزہ میں جنگ کے خاتمے اور امن کے قیام کے لیے صدر ٹرمپ کے غزہ منصوبے کا خیر مقدم کیا ہے۔

 ان کے مطابق اس امن معاہدے کی بدولت غزہ میں جاری خونریزی رکنے میں مدد ملے گی۔

انہوں نے بتایا کہ پاکستان نے اس قرارداد کے حق میں ووٹ دیا کیونکہ بنیادی مقصد معصوم فلسطینیوں کے قتل عام کو روکنا اور خطے میں پائیدار استحکام لانا ہے۔ پاکستانی مندوب نے زور دیا کہ غزہ سے اسرائیلی فورسز کا مکمل انخلاء ناگزیر ہے۔

عاصم افتخار نے کہا کہ پاکستان کا موقف واضح ہے: 1967 سے پہلے کی سرحدوں کے مطابق ایک آزاد فلسطینی ریاست قائم کی جائے جس کا دارالحکومت القدس ہو۔

یاد رہے کہ سلامتی کونسل نے ٹرمپ کے 20 نکاتی غزہ منصوبے کی حمایت میں قرارداد منظور کی ہے۔ پاکستان سمیت 13 ممالک نے حمایت میں ووٹ دیا جبکہ روس اور چین نے ووٹنگ میں حصہ نہیں لیا۔

قرارداد میں غزہ کے لیے بین الاقوامی استحکام فورس کی تعیناتی اور عبوری حکومت کے قیام جیسے اہم نکات شامل ہیں۔