اسلام آباد میں دسمبر 2025 تک 30 مفت وائی فائی ہاٹ سپاٹ قائم کرنے کا اعلان

حکومت نے عوام کے لیے مفت انٹرنیٹ کی سہولیات میں اضافہ کرنے کے منصوبے کے تحت فیصلہ کیا ہے کہ دسمبر 2025 تک وفاقی دارالحکومت اسلام آباد میں30 مفت وائی فائی ہاٹ سپاٹ قائم کیے جائیں گے۔

نیشنل ٹیلی کمیونیکیشن کارپوریشن (این ٹی سی) نے قومی اسمبلی کی قائمہ کمیٹی برائے آئی ٹی کو بریفنگ دیتے ہوئے بتایا کہ منصوبے پر تیزی سے کام جاری ہے اور مقررہ وقت تک یہ تمام ہاٹ اسپات فعال کر دیے جائیں گے۔

حکام کے مطابق یہ منصوبہ ملک میں ڈیجیٹل انفراسٹرکچر کو مضبوط بنانے کی حکومتی حکمتِ عملی کا حصہ ہے۔ مفت وائی فائی پوائنٹس اسلام آباد کے اہم عوامی مقامات، مارکیٹوں، تعلیمی زونز اور سرکاری عمارتوں کے قریب نصب کیے جائیں گے تاکہ شہریوں اور طلبہ کو ہائی اسپیڈ انٹرنیٹ باآسانی میسر ہو۔

این ٹی سی نے مزید بتایا کہ ادارہ ملک کے 100 سے زائد شہروں میں 3 ہزار سے زیادہ سرکاری و نجی اداروں کو خدمات فراہم کر رہا ہے جن میں سائبر سیکیورٹی سپورٹ بھی شامل ہے۔

حکام کے مطابق یہ منصوبہ اسلام آباد کو ایک ٹیکنالوجی فرینڈلی شہر بنانے کی سمت اہم پیش رفت ثابت ہوگا۔