تعلیمی اداروں میں بھرتیوں سے قبل سیکس آفینڈرز ویریفکیشن کی تجویز

پراسیکیوٹر جنرل پنجاب سید فرہاد علی شاہ نے بچوں کے تحفظ کے لیے ایک اہم تجویز دے دی ہے، جس کے مطابق صوبے کے تمام تعلیمی اداروں میں بھرتی سے پہلے امیدواروں کی سیکس آفینڈرز رجسٹر کے ذریعے لازمی تصدیق کی جائے۔

انہوں نے اس حوالے سے دو صفحات پر مشتمل مراسلہ سیکرٹری پراسیکیوشن کو بھجوا دیا ہے۔

مراسلے میں کہا گیا ہے کہ فیکلٹی اور دیگر اسٹاف کی تقرری سے قبل نادرا کے سیکس آفینڈرز ریکارڈ سے جانچ ناگزیر ہے، کیونکہ یہ سسٹم تعلیمی اداروں میں بچوں کی حفاظت کے لیے انتہائی مؤثر ثابت ہوسکتا ہے۔

انہوں نے نشاندہی کی کہ موجودہ بھرتی نظام میں ایک بڑا خلا موجود ہے جس سے ایسے افراد کی تقرری کا خطرہ بڑھ جاتا ہے جن کا جنسی جرائم کا سابقہ ریکارڈ ہوتا ہے اور یہ پورے تعلیمی ماحول کے لیے خطرناک ہوسکتا ہے۔

پراسیکیوٹر جنرل نے محکمہ قانون و انصاف کو تجویز دی کہ سیکس آفینڈر رجسٹر تک رسائی کے لیے واضح میکنزم بنایا جائے اور سرکاری و نجی تمام تعلیمی اداروں میں اس ویریفکیشن کو لازمی قرار دیا جائے۔

انہوں نے مزید سفارش کی کہ نہ صرف نئی بھرتیوں بلکہ موجودہ ملازمین کی بھی نادرا کے رجسٹر سے لازمی تصدیق کی جائے تاکہ بچوں کے تحفظ کو یقینی بنایا جا سکے۔