راولپنڈی کرپشن کیس: پولیس حراست سے فرار ہونے والے اقبال سنگھیڑا دوبارہ گرفتار

راولپنڈی کے کرپشن کیس میں پولیس کی حراست سے فرار ہونے والے سابق اے ڈی سی سیالکوٹ اقبال سنگھیڑا کو پولیس نے دوبارہ گرفتار کر لیا۔

پولیس ذرائع کے مطابق اقبال سنگھیڑا کو راولپنڈی پولیس کی خصوصی ٹیم نے گرفتار کیا اور اب اسے کوٹ لکھپت جیل منتقل کیا جا رہا ہے۔

ملزم کی گرفتاری کے لیے تین مختلف ٹیمیں تشکیل دی گئی تھیں، جن کی سربراہی ایس پی صدر ڈویژن انعم شیر خان کر رہے تھے۔ اقبال سنگھیڑا 13 نومبر کو راولپنڈی سے لاہور منتقلی کے دوران پولیس حراست سے فرار ہو گیا تھا۔

غفلت برتنے والے چار پولیس اہلکار کو نوکری سے برخاست کر دیا گیا، جبکہ چکری ریسٹ ایریا میں جیو فینسنگ کا عمل مکمل کر لیا گیا۔ گرفتار اہلکاروں کا موبائل ڈیٹا بھی حاصل کیا گیا ہے تاکہ ان کے ملزمان سے رابطے کی تصدیق ہو سکے۔

ملزم کے فرار میں استعمال ہونے والی گاڑی کا ڈیٹا حاصل کرنے کے لیے مختلف اضلاع کے ایکسائز دفاتر کو مراسلہ بھیجا گیا، جبکہ موٹروے کے ٹول پلازہ سے گاڑی کی معلومات حاصل کرنے کے لیے این ایچ اے سے بھی تفصیلات طلب کی گئی ہیں۔

واضح رہے کہ اقبال سنگھیڑا اینٹی کرپشن عدالت راولپنڈی میں پیشی کے بعد لاہور جیل منتقل ہونے کے دوران فرار ہوا تھا، اور اس کے فرار پر اس کے بھائی سمیت 6 نامعلوم ملزمان اور 4 پولیس اہلکاروں کے خلاف مقدمہ درج ہے۔