وزیرخزانہ: سعودی عرب کی 10 ارب ڈالر سرمایہ کاری میں دلچسپی برقرار

وفاقی وزیر خزانہ محمد اورنگزیب نے کہا ہے کہ سعودی عرب پاکستان میں 10 ارب ڈالر کی سرمایہ کاری میں دلچسپی برقرار رکھے ہوئے ہے۔

ان کا کہنا تھا کہ پاکستان اور سعودی عرب کے تعلقات فنانسنگ سے بی ٹو بی سرمایہ کاری ماڈل کی جانب منتقل ہو گئے ہیں۔ سرمایہ کاری کے ترجیحی شعبوں میں مائننگ، آئی ٹی، زراعت، فوڈ سیکٹر اور ٹورازم شامل ہیں۔

وزیرخزانہ نے بتایا کہ ریکوڈک کی پہلی پیداوار سے 2.8 ارب ڈالر کی برآمدی صلاحیت پیدا ہوگی، اور سعودی کمپنی منارا منرلز نے 15 فیصد شیئر خریدنے میں دلچسپی ظاہر کی ہے۔ انہوں نے امید ظاہر کی کہ امریکی ایکزم بینک کی شمولیت جلد بحال ہو جائے گی۔

انہوں نے مزید کہا کہ آئی ایم ایف کے 7 ارب ڈالر پروگرام کا دوسرا جائزہ مکمل ہو چکا ہے اور بورڈ کا فیصلہ دسمبر کے آغاز میں متوقع ہے۔