خیبرپختونخوا میں سکیورٹی فورسز کی کارروائی، بھارتی حمایت یافتہ 23 خوارج ہلاک

سکیورٹی فورسز نے خفیہ معلومات کی بنیاد پر خیبرپختونخوا کے ضلع کرم میں دو کارروائیاں کرتے ہوئے بھارتی حمایت یافتہ 23 خوارج دہشت گرد ہلاک کر دیے۔

آئی ایس پی آر کے مطابق پہلی کارروائی میں ایک علاقے کو گھیر کر فائرنگ کے شدید تبادلے کے دوران 12 دہشت گرد ہلاک ہوئے۔ بعد ازاں دہشت گردوں کے ایک اور گروہ کی موجودگی کی اطلاع پر کی جانے والی کارروائی میں 11 مزید خوارج مارے گئے۔

آئی ایس پی آر نے بتایا کہ خوارج کے خلاف دونوں آپریشنز خفیہ اطلاعات پر کیے گئے، علاقے کو دہشت گردوں سے پاک کرنے کے لیے کارروائیاں جاری ہیں اور سکیورٹی فورسز نے بھارتی حمایت یافتہ دہشت گردوں کے ٹھکانوں کی تلاش تیز کر دی ہے۔

صدرِ مملکت آصف علی زرداری نے سکیورٹی فورسز کی پیشہ ورانہ مہارت اور دہشت گرد نیٹ ورک کو توڑنے کی کامیابی کی تعریف کی اور کہا کہ پاکستان کی سرزمین سے غیر ملکی پشت پناہی میں سرگرم دہشت گردی کا خاتمہ قومی اتفاق رائے سے کیا جا رہا ہے۔

وزیراعظم محمد شہباز شریف نے ضلع کرم میں کارروائیوں پر سکیورٹی فورسز کو خراج تحسین پیش کرتے ہوئے کہا کہ عزمِ استحکام کے تحت دہشت گردی کے خاتمے تک یہ جنگ جاری رہے گی اور قوم افواج کے شانہ بشانہ ہے۔

وفاقی وزیر داخلہ محسن نقوی نے کہا کہ قوم سکیورٹی فورسز کی جرات اور پیشہ ورانہ صلاحیتوں پر فخر کرتی ہے اور خیبر پختونخوا میں بھارتی حمایت یافتہ دہشت گردوں کے مکمل خاتمے کے لیے پرعزم ہیں۔