ٹیرف پالیسیوں سے کھربوں ڈالر حاصل کیے، پانچ جنگیں روکیں:ٹرمپ کا دعویٰ

امریکی صدر ڈونلڈ ٹرمپ نے کہا ہے کہ امریکا ٹیرف اور غیر ملکی سرمایہ کاری کے ذریعے بیرونِ ممالک سے کھربوں ڈالر وصول کر رہا ہے۔

سوشل میڈیا پلیٹ فارم ’ٹروتھ‘ پر اپنے پیغام میں ان کا کہنا تھا کہ انہی معاشی اقدامات کی بدولت امریکا آج پہلے سے کہیں زیادہ مضبوط اور باوقار بن چکا ہے۔

ٹرمپ کا کہنا تھا کہ انہوں نے آٹھ میں سے پانچ جنگیں محض ٹیرف کی دھمکی دے کر روک دی تھیں، جس سے نہ صرف عالمی تناؤ میں کمی آئی بلکہ امریکی معیشت کو بھی فائدہ پہنچا۔

انہوں نے دعویٰ کیا کہ ملک میں افراطِ زر تقریباً ختم ہو چکی ہے، جبکہ جوبائیڈن کے دور میں امریکا نے اپنی تاریخ کی بدترین مہنگائی دیکھی۔

ٹرمپ کے مطابق اسٹاک مارکیٹ گزشتہ نو ماہ میں 48 مرتبہ ریکارڈ سطح پر پہنچی ہے، جو ان کی معاشی حکمتِ عملی کی کامیابی کا ثبوت ہے۔