وزیراعظم شہباز شریف کی ضمنی انتخابات میں لیگی امیدواروں کی کامیابی پر مبارکباد

وزیراعظم محمد شہباز شریف نے پنجاب میں ہونے والے ضمنی انتخابات میں مسلم لیگ (ن) کے امیدواروں کی کامیابی پر انہیں مبارکباد پیش کی ہے۔

 انہوں نے این اے 185 ڈیرہ غازی خان سے سردار محمود قادر خان لغاری، پی پی 203 ساہیوال سے چودھری حنیف جٹ، پی پی 87 میانوالی سے علی حیدر نور نیازی، پی پی 116 فیصل آباد سے احمد شہریار، پی پی 115 فیصل آباد سے محمد طاہر پرویز، این اے 104 فیصل آباد سے دانیال احمد اور پی پی 98 فیصل آباد سے آزاد علی تبسم کی فتح کو قابلِ تعریف قرار دیا۔

وزیراعظم نے کہا کہ ضمنی انتخابات میں کامیابی مسلم لیگ (ن) کے قائد میاں نواز شریف کے ویژن، ان کی مؤثر قیادت اور پارٹی کارکنان کی انتھک محنت کا نتیجہ ہے۔

انہوں نے مزید کہا کہ یہ نتائج وزیراعلیٰ پنجاب مریم نواز کی عوامی خدمت اور صوبے کی ترقی کے لیے مسلسل کوششوں پر عوام کے اعتماد کا اظہار ہیں۔

شہباز شریف کے مطابق این اے 185 میں فتح مسلم لیگ (ن) کی عوام دوست پالیسیوں پر عوام کے بھروسے کی علامت ہے، جبکہ مجموعی کامیابی موجودہ حکومت کی کارکردگی پر عوامی اطمینان کی واضح تصویر پیش کرتی ہے۔