بھارت سری لنکا کیلئے پاکستانی امداد روک رہا ہے، خصوصی طیارہ 60 گھنٹے سے تاخیر کا شکار

وزارتِ خارجہ پاکستان نے انکشاف کیا ہے کہ بھارت مسلسل پاکستان کی جانب سے سری لنکا کے سیلاب متاثرین کے لیے بھیجی جانے والی انسانی ہمدردی پر مبنی امداد کو روک رہا ہے، جس کے باعث خصوصی طیارہ 60 گھنٹے سے زائد تاخیر کا شکار ہے اور ابھی تک بھارتی کلیئرنس کا منتظر ہے۔

ترجمان دفتر خارجہ کے مطابق پاکستان نے شدید بارشوں اور سیلاب سے متاثرہ سری لنکن عوام کی فوری مدد کے لیے امدادی سامان بھیجنے کا فیصلہ کیا تھا۔ تاہم بھارتی حکام کی جانب سے غیر ضروری تاخیر ان اقدامات کو بری طرح متاثر کر رہی ہے۔

بیان میں بتایا گیا کہ بھارت نے 48 گھنٹے بعد جزوی کلیئرنس تو جاری کر دی، مگر یہ اجازت "غیر مؤثر اور عملی طور پر ناقابلِ استعمال" تھی، کیونکہ اس کی مدت محض چند گھنٹوں تک محدود رکھی گئی۔ مزید برآں، واپسی کی پرواز کے لیے کوئی اجازت بھی فراہم نہیں کی گئی تھی۔

ترجمان کا کہنا ہے کہ اس بھارتی رویّے نے سری لنکن عوام کی مدد کے جذبے کے تحت کی جانے والی ہنگامی کوششوں کو سخت مشکلات سے دوچار کر دیا ہے۔ پاکستان نے ایک بار پھر مطالبہ کیا ہے کہ بھارت انسانی بنیادوں پر مزید رکاوٹیں نہ ڈالے اور فوری طور پر کلیئرنس فراہم کرے تاکہ امدادی سامان بروقت متاثرہ افراد تک پہنچایا جا سکے۔