پراڈا نے 1.38 بلین ڈالر میں ورساچے کو خرید لیا، دو مشہور اطالوی فیشن برانڈز ایک چھت تلے آ گئے

پراڈا نے اعلان کیا ہے کہ اس نے ورساچے کو خرید لیا ہے، جس سے دو مشہور اطالوی لگژری فیشن ہاؤسز ایک چھت تلے آ گئے ہیں۔

 یہ سودا 1.38 بلین ڈالر (1.04 بلین پاؤنڈ) میں طے پایا، جو کہ 2018 میں کیپری ہولڈنگز کی جانب سے ورساچے خریدنے کے تقریباً 2 بلین ڈالر کی قیمت سے کافی کم ہے۔

اس خریداری سے پراڈا کے ڈیزائنر برانڈز کے پورٹ فولیو میں اضافہ ہوگا، جس میں میو میو بھی شامل ہے، اور یہ پراڈا کو فرنچ لگژری گروپ LVMH (جس کے پاس ڈائر، فینڈی اور لوی وِٹن ہیں) کے ساتھ مقابلہ کرنے کے قابل بنائے گا۔

ڈوناتلا ورساچے نے 27 سال کے بعد مارچ میں برانڈ کی کریئیٹو چیف کی ذمہ داری چھوڑ دی اور یہ کردار داریو وٹالی (سابق ڈیزائن ڈائریکٹر میو میو) کو سونپ دیا گیا۔ ڈوناتلا نے 1997 سے کمپنی کی قیادت کی تھی، جب ان کے بھائی جیانی ورساچے کا قتل ہوا۔

ورساچے کو تقریباً 700 ملین ڈالر کے نقصان پر بیچا گیا، کیونکہ سیلز میں سست روی دیکھنے میں آئی اور کیپری ہولڈنگز نے اپنے دیگر برانڈز، جیسے مائیکل کورس اور جمی چو، میں بھی اصلاحات کیں۔

 کیپری کی ملکیت کے دوران، ورساچے نے اپنے مشہور آرائشی ڈیزائنز کی بجائے زیادہ سادہ اور منیمالسٹ انداز اپنایا، اور قیمتیں بھی بڑھائیں۔

پراڈا نے اس خریداری کی تصدیق کرتے ہوئے کہا کہ تمام ریگولیٹری منظوری حاصل کر لی گئی ہے۔

 کیپری ہولڈنگز اس رقم کو قرض ادا کرنے میں استعمال کرے گی، جس سے ان کی مالی صورتحال مضبوط ہوگی۔ پراڈا کے سی ای او آندریا گویرا نے ورساچے کی “وسیع صلاحیت” پر زور دیا اور کہا کہ اسے مکمل کرنے کے لیے صبر اور منظم حکمت عملی کی ضرورت ہوگی۔