انسٹا گرام ریلز اب ٹی وی اسکرین پر، میٹا اور ایمازون کی نئی ایپ متعارف

اگر آپ موبائل فون پر انسٹا گرام ریلز دیکھنے کے عادی ہیں تو اب یہ مختصر ویڈیوز بڑی اسکرین پر دیکھنا بھی ممکن ہو گیا ہے۔

 میٹا نے ایمازون کے ساتھ شراکت داری کرتے ہوئے انسٹا گرام فار ٹی وی ایپ لانچ کر دی ہے، جس کے ذریعے صارفین مخصوص فائر ٹی وی ڈیوائسز پر انسٹا گرام ریلز دیکھ سکتے ہیں۔

اس نئی ایپ کے ذریعے صارفین نہ صرف ریلز دیکھ سکیں گے بلکہ انہیں لائیک کرنے اور شیئر کرنے کی سہولت بھی حاصل ہوگی۔ 

اس کے علاوہ مختلف انسٹا گرام اکاؤنٹس کے درمیان سوئچ کرنا اور اپنی دلچسپی کے مطابق مواد تلاش کرنا بھی ممکن ہوگا۔

ایپ میں صارفین اپنے پسندیدہ کریئیٹرز اور دیگر اکاؤنٹس کو سرچ کر سکیں گے اور انہیں ایسا ہی تجربہ ملے گا جیسے وہ موبائل فون پر انسٹا گرام استعمال کر رہے ہوں۔

 کمپنی کے مطابق یہ ایپ ایک وقت میں 5 انسٹا گرام اکاؤنٹس کو سپورٹ کرے گی، جس سے ایک ہی گھر کے متعدد افراد اس سے فائدہ اٹھا سکیں گے۔

میٹا کے مطابق یہ ایپ انسٹا گرام کے ریکمینڈیشن الگورتھم کو استعمال کرتی ہے، جس کے باعث مواد کی تجویز کا عمل موبائل ایپ جیسا ہی رہے گا۔ 

یہ نئی ایپ فی الحال امریکا میں ایمازون ایپ اسٹور پر دستیاب ہے، جبکہ دیگر ممالک میں اس کی دستیابی کے حوالے سے کوئی حتمی تاریخ سامنے نہیں آئی۔