2025 میں پاکستان میں ٹک ٹاک: سب سے زیادہ سرچ کیے جانے والے موضوعات اور شخصیات کی رپورٹ جاری

مقبول ویڈیو شیئرنگ پلیٹ فارم ٹک ٹاک نے سال 2025 کے لیے پاکستان میں سب سے زیادہ تلاش کیے جانے والے موضوعات اور شخصیات کے اعداد و شمار جاری کر دیے ہیں۔ 

رپورٹ سے ظاہر ہوتا ہے کہ پاکستانی صارفین نے ٹک ٹاک کو صرف تفریح کے لیے نہیں بلکہ معلومات، خریداری کے فیصلے، تعلیمی رہنمائی اور نئے ہنر سیکھنے کے لیے بھی بھرپور استعمال کیا۔

جنوبی ایشیا میں ٹک ٹاک کے کانٹینٹ آپریشنز کی سربراہ عمیس نوید کے مطابق، ٹک ٹاک سرچ پاکستان میں روزمرہ زندگی کا ایک لازمی حصہ بن چکی ہے۔ 

صارفین نہ صرف ویڈیوز دیکھ رہے ہیں بلکہ حقیقی وقت میں معلومات بھی تلاش کر رہے ہیں، چاہے ویک اینڈ ٹرپ کی منصوبہ بندی ہو یا کسی پروڈکٹ کے ریویو۔

صحت اور فٹنس:
2025 میں فٹنس ٹاک کی تلاش میں 66 فیصد اضافہ ہوا، جس سے ظاہر ہوتا ہے کہ پاکستانی اپنی صحت اور ورزش کے حوالے سے زیادہ باشعور ہو گئے ہیں۔

سیاحت اور کھانے:

سیاحتی مواد کی تلاش میں 53 فیصد اضافہ ہوا، جبکہ کھانوں کی تلاش میں 52 فیصد اضافہ ریکارڈ کیا گیا۔

 سب سے زیادہ دیکھے جانے والے سیاحتی مقامات میں اسلام آباد، ہنزہ کا التت فورٹ، دریائے چناب، لاہور اور کراچی شامل ہیں۔ 

روایتی کھانوں کے علاوہ ’لاوا برگر‘، ’ماچا ڈرنک‘ اور ’دبئی چاکلیٹ‘ بھی صارفین کی دلچسپی کا مرکز بنے۔

کرکٹ اور شوبز:
کرکٹ سب سے مقبول ترین موضوع رہا۔ صارفین نے بابر اعظم کی سینچری، پاکستان بمقابلہ جنوبی افریقہ اور انڈیا کے میچز کے لمحات سب سے زیادہ سرچ کیے۔ 

شوبز میں پاکستانی ڈرامے، ترک سیریز اور ریئلٹی شوز ’تماشا‘ اور ’ہم ایوارڈز‘ زیر بحث رہے۔

لائف اسٹائل اور ٹیکنالوجی:

خواتین نے ’مہندی کے ڈیزائن‘ کی تلاش کی، جبکہ ٹیکنالوجی کے شوقین صارفین نے AI، پرامپٹس اور سافٹ ویئر اپڈیٹس کے بارے میں معلومات حاصل کیں۔ 

پروڈکٹ ریویوز دیکھنا بھی ٹاپ ٹرینڈز میں شامل رہا، جو ظاہر کرتا ہے کہ پاکستانی صارفین زیادہ سوچ سمجھ کر خریداری کرتے ہیں۔