وفاقی وزیر اطلاعات کا اے آئی کے بڑھتے استعمال پر تخلیقی شعبے میں روزگار کے خدشات کا اظہار

وفاقی وزیر اطلاعات عطا اللہ تارڑ نے مصنوعی ذہانت (AI) کے بڑھتے ہوئے استعمال کے باعث مختلف شعبوں، خصوصاً اشتہاری اور تخلیقی صنعت میں روزگار کے مسائل پر گہری تشویش کا اظہار کیا ہے۔

سماجی رابطوں کے پلیٹ فارم ایکس (ٹوئٹر) پر اپنے بیان میں عطا اللہ تارڑ نے کہا کہ پاکستان کے اشتہاری شعبے میں AI کے بڑھتے ہوئے استعمال سے تخلیقی پیشوں سے وابستہ افراد، جیسے کہ کانٹینٹ کریئیٹرز، گرافک ڈیزائنرز، ایڈیٹرز، کریئیٹو ڈائریکٹرز، اداکار، اداکارائیں، ماڈلز، ٹیکنیشنز اور کیمرہ مین شدید خطرات سے دوچار ہیں۔ 

ان کے مطابق کئی تخلیقی پیشے مستقبل میں AI کے بڑھتے اثرات کے باعث متروک ہو سکتے ہیں۔

وفاقی وزیر نے زور دیا کہ اس مسئلے کا حل پالیسی سطح پر بروقت اور مؤثر ہونا چاہیے تاکہ ٹیکنالوجی کے استعمال کے ساتھ انسانی افرادی قوت کے مفادات کا تحفظ بھی یقینی بنایا جا سکے۔