لاہور ہائیکورٹ میں مریم نواز اور عظمی بخاری کے خلاف توہین عدالت کی درخواست دائر

لاہور ہائیکورٹ میں وزیر اعلیٰ پنجاب مریم نواز اور عظمی بخاری کے خلاف توہین عدالت کی درخواست دائر کر دی گئی ہے۔

 درخواست شہری منیر احمد نے اظہر صدیق ایڈوکیٹ کے ذریعے دائر کی ہے۔

درخواست میں موقف اختیار کیا گیا ہے کہ پنجاب پراپرٹی اونرشپ ایکٹ سے متعلق عدالتی حکم پر دیے گئے بیانات توہین عدالت کے زمرے میں آتے ہیں اور اس قانون کی معطلی کے حوالے سے بیانات نے عدلیہ کی ساکھ متاثر کی ہے۔

درخواست میں مزید کہا گیا کہ وزیر اعلیٰ پنجاب کے بیانات نے عدالت کو متنازعہ بنانے کی کوشش کی، عدالتی حکم کو "لینڈ مافیا کے حق میں" قرار دینا سنگین الزام ہے، اور لاہور ہائیکورٹ کے فیصلے کو سیاسی رنگ دینا غیر قانونی اقدام ہے۔

درخواست گزار نے عدالت سے استدعا کی ہے کہ اعلیٰ عہدیداران کے بیانات عدالتی عمل کو متاثر کر سکتے ہیں، لہٰذا مریم نواز اور عظمی بخاری کو توہین عدالت کا شوکاز نوٹس جاری کیا جائے اور ان کے خلاف مناسب قانونی کارروائی کی جائے۔