ریلوے پولیس کی ایمانداری کی مثال، 38 لاکھ روپے مسافر کو بحفاظت واپس

ریلوے پولیس نے ایمانداری اور پیشہ ورانہ مہارت کی اعلیٰ مثال قائم کرتے ہوئے کراچی سے ٹوبہ ٹیک سنگھ سفر کرنے والے مسافر محسن مشتاق کی 38 لاکھ روپے نقدی واپس کر دی۔

واقعہ کے مطابق مسافر محسن مشتاق پاکستان ایکسپریس کے ذریعے حیدرآباد ریلوے اسٹیشن پر کسی ذاتی کام کی غرض سے اتر گیا، جس دوران ٹرین روانہ ہو گئی اور اس کا سامان، جس میں نقدی موجود تھی، ٹرین میں رہ گیا۔

دورانِ ڈیوٹی کانسٹیبل راؤ شریف نے بیگ دریافت کیا اور اسے فوری طور پر تحویل میں لے لیا۔ 

بعد ازاں مسافر تھانے پہنچا اور سامان کے بارے میں اطلاع دی، جس پر اسے بتایا گیا کہ بیگ ریلوے پولیس کے پاس موجود ہے۔

مسافر قراقرم ایکسپریس کے ذریعے روہڑی پہنچا اور وہاں ہیلپ سینٹر میں سب انسپکٹر کی موجودگی میں اپنے بیگ کی شناخت کی۔

 ریلوے پولیس نے بیگ کی مکمل گنتی اور تصدیق کے بعد نقدی 38 لاکھ روپے مسافر کے حوالے کر دی۔

محسن مشتاق نے ریلوے پولیس کی ایمانداری اور پیشہ ورانہ رویے کو سراہا اور تشکر کا ویڈیو پیغام جاری کیا۔