سکھ فار جسٹس نے بھارت میں عیسائیوں کے لیے محفوظ وطن "ٹرمپ لینڈ" کی تجویز پیش کر دی

سکھ فار جسٹس تنظیم نے بھارت میں عیسائیوں کے لیے ایک محفوظ وطن "ٹرمپ لینڈ" کے قیام کا مطالبہ کیا ہے۔ 

تنظیم نے شمال مشرقی بھارت میں مجوزہ علاقے کا نقشہ بھی جاری کیا ہے، جس کے لیے اقوام متحدہ کے تسلیم شدہ حقِ خود ارادیت کو بنیاد بنایا گیا ہے۔

تنظیم کے مطابق یہ خطہ امریکی صدر ڈونلڈ ٹرمپ کے نام سے منسوب کیا جائے گا۔ سکھ فار جسٹس کے رہنما گرپتونت سنگھ پنوں نے صدر ٹرمپ سے براہِ راست مداخلت کی اپیل کی ہے۔

گرپتونت سنگھ پنوں نے کہا کہ بھارت میں عیسائی برادری کرسمس کے دوران بھی منظم تشدد اور جبر کا سامنا کر رہی ہے، جبکہ بھارتی پنجاب میں سکھوں کو بھی شدید خطرات لاحق ہیں۔

تنظیم کے مطابق مجوزہ خطہ "سیون سسٹرز اسٹیٹس" میں واقع ہے، جس میں ناگالینڈ، میزورم، میگھالیہ، منی پور، تریپورہ اور آسام شامل ہیں، اور یہ علاقے تاریخی طور پر اکثریتی عیسائی آبادی پر مشتمل ہیں۔

 "ٹرمپ لینڈ" کو ایک محفوظ عیسائی کوریڈور کے طور پر تجویز کیا گیا ہے تاکہ لاکھوں عیسائی پناہ حاصل کر سکیں۔

گرپتونت سنگھ پنوں نے مزید کہا کہ بھارتی ریاست کی پالیسیاں عیسائیوں کے لیے سخت ہیں، جن میں بائبل کی تبلیغ کو جرم قرار دینا، گرجا گھروں کو نذرِ آتش کرنا، عیسائی بستیوں پر حملے اور لوگوں کو بے گھر اور خوفزدہ کرنا شامل ہیں۔