نادیہ خان بیٹے کے ساتھ مہندی میں بھارتی گانے پر ڈانس، سوشل میڈیا پر ملا جلا ردعمل

پاکستان کی معروف ٹی وی میزبان اور اداکارہ نادیہ خان شوبز انڈسٹری کی تجربہ کار شخصیات میں شامل ہیں۔

 انہوں نے کئی مشہور ڈراموں جیسے ’بندھن‘، ’پل دو پل‘، ’دیس پردیس‘، ’وحشی‘، ’ایسی ہے تنہائی‘، ’ڈولی ڈارلنگ‘ اور ’کیسی عورت ہوں میں‘ میں اداکاری کے جوہر دکھائے۔ 

نادیہ خان کی اصل شہرت ان کے شو ’نادیہ خان شو‘ سے حاصل ہوئی۔

حالیہ برسوں میں ان کے پروگرامز ’رائز اینڈ شائن‘ اور ’کیا ڈرامہ ہے‘ بھی کافی مقبول ہوئے ہیں۔

نادیہ خان اپنی کھری بات، بے باک رائے اور حب الوطنی کے اظہار کی وجہ سے بھی جانی جاتی ہیں، تاہم ان کے سخت تبصروں پر اکثر تنقید بھی سامنے آتی رہی ہے۔

حال ہی میں نادیہ خان اپنے بیٹے اذان کے ساتھ ایک دوست کی بیٹی کی مہندی کی تقریب میں شریک ہوئیں۔

 اس موقع پر انہوں نے نیلے رنگ کا مخملی فرشی شلوار سوٹ زیب تن کیا، جبکہ ان کے بیٹے نے سیاہ شلوار قمیض کے ساتھ بیج رنگ کی شال اوڑھی ہوئی تھی۔

تقریب میں نادیہ خان اور ان کے بیٹے اذان نے بھارتی گانے ’سینیوریٹا‘ پر ڈانس کیا، جس کی ویڈیو نادیہ خان نے انسٹاگرام پر شیئر کی۔

 ویڈیو سامنے آنے کے بعد سوشل میڈیا پر صارفین کے ردعمل میں ملا جلا تاثرات دیکھنے کو ملے، کچھ صارفین نے بھارتی گانے پر ڈانس کرنے پر نادیہ خان کی حب الوطنی پر سوال اٹھائے اور انہیں تنقید کا نشانہ بنایا۔