ایف ڈی اے نے وزن کم کرنے والی گولی ویگووی کی منظوری دے دی

واشنگٹن: امریکہ کے فوڈ اینڈ ڈرگ ایڈمنسٹریشن (FDA) نے وزن کم کرنے والی معروف دوا ویگووی (Wegovy) کو باضابطہ طور پر منظور کر لیا ہے۔

 یہ پیش رفت موٹاپے کے علاج میں ایک اہم سنگِ میل قرار دی جا رہی ہے کیونکہ اب مریضوں کے لیے انجیکشن کی بجائے روزانہ استعمال کی جانے والی گولی دستیاب ہوگی۔

ویگووی گولی اسی فعال جزو سیمگلوٹائیڈ پر مشتمل ہے جو پہلے سے ویگووی اور ذیابیطس کے علاج میں استعمال ہونے والے ہفتہ وار انجیکشن اوزیمپک میں بھی موجود ہے۔ 

کلینیکل ٹرائلز میں گولی نے تقریباً وہی نتائج دکھائے جو انجیکشن میں دیکھے گئے، یعنی اوسطاً 64 ہفتوں میں 14 فیصد وزن میں کمی جبکہ پلیسبو استعمال کرنے والوں میں صرف 2 فیصد کمی دیکھی گئی۔

کمپنی کے مطابق، ویگووی کی گولی جنوری 2026 سے امریکہ میں ڈاکٹر کے نسخے پر دستیاب ہوگی اور ابتدائی خوراک کی قیمت 149 ڈالر رکھی گئی ہے۔

 جیسے جیسے خوراک میں اضافہ ہوگا، قیمت بھی بڑھنے کا امکان ہے، تاہم انشورنس رکھنے والے مریضوں کے لیے اخراجات کم رہیں گے۔

ڈاکٹرز کا کہنا ہے کہ گولی خالی پیٹ تھوڑے پانی کے ساتھ لینی چاہیے اور کھانے، پینے یا دوسری دوائیں لینے سے 30 منٹ تک پرہیز کرنا لازمی ہے، کیونکہ یہی شرط پہلے ذیابیطس کی دوا ریبیلس (Rybelsus) کے کم استعمال کی بڑی وجہ تھی۔

ایف ڈی اے کی اس نئی منظوری سے موٹاپے کے علاج میں ادویات کی دوڑ تیز ہو گئی ہے، اور ایک اور امریکی کمپنی کی زیرِ تجربہ گولی اورفورگلیپرون کو بھی موسمِ گرما تک منظوری ملنے کی توقع ہے۔

امریکی تحقیق کے مطابق تقریباً ہر آٹھ میں سے ایک بالغ فرد GLP-1 گروپ کی کوئی نہ کوئی دوا استعمال کر رہا ہے، جن میں ویگووی، اوزیمپک، زپ باؤنڈ اور مونجارو شامل ہیں۔